થાણેની વિશેષ અદાલતે સગીરા પર દુષ્કર્મ કેસમાં શખસને 20 વર્ષની સખત કેદ ફટકારી

'ધ હિન્દુ'ના અહેવાલ મુજબ મહારાષ્ટ્રના થાણે જિલ્લાની એક વિશેષ અદાલતે ૩૫ વર્ષના એક શખસને સગીર વયની બાળકી પર લગ્નના વાયદે વારંવાર દુષ્કર્મ આચરવાના ગુનામાં 20 વર્ષની સખત કેદની સજા ફટકારી છે. આ કેસમાં વધારાના સેશન્સ ન્યાયાધીશ પ્રેમલ એસ. વિઠલાણીએ આરોપી શ્રીનિવાસ અશોક યેલગોંડાને ભારતીય દંડ સંહિતા અને પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સિસ યાની કે પોક્સો એક્ટની સંબંધિત કલમો હેઠળ દોષિત જાહેર કર્યો હતો.

અદાલતે નોંધ્યું હતું કે ગુનામાં હિંસા અને પૂર્વઆયોજનનો અભાવ હતો, જે એક હળવાશભર્યું પરિબળ ગણાય, પરંતુ કાયદો ઓછામાં ઓછી 20 વર્ષની મુદતની સજા ફરજિયાત કરે છે. આ કેસની વિગતો આપતા અભિયોજન પક્ષે જણાવ્યું હતું કે ભોગ બનનાર સગીરા અને આરોપી દિવા ઈસ્ટ ખાતે એક જ હાઉિંસગ સોસાયટીમાં રહેતા હતા. જૂન ૨૦૨૦માં બંને વચ્ચે ઓળખાણ થઈ હતી અને ત્યારબાદ ફોન પર ચેટિંગ દ્વારા બંને વચ્ચે પ્રેમસંબંધ બંધાયો હતો.

સ્પેશિયલ પબ્લિક પ્રોસિક્યુટર રેખા હિવરાલે અદાલતમાં જણાવ્યું હતું કે આરોપીએ નવેમ્બર ૨૦૨૦માં પ્રથમ વખત પડોશીના ખાલી ફ્લેટમાં લગ્નની લાલચ આપીને સગીરા પર જાતીય શોષણ ગુજાર્યું હતું અને ત્યારબાદ અનેક વખત તેની સાથે દુષ્કર્મ આચર્યું હતું. જ્યારે ફેબ્રુઆરી ૨૦૨૨માં આરોપીએ પોતાની લગ્ન કરવાની વચનમાંથી પીછેહઠ કરી દીધી, ત્યારે બંને વચ્ચે વિવાદ થયો અને આ સમગ્ર અત્યાચાર પ્રકાશમાં આવ્યો હતો.

આ કેસમાં આરોપી સામેના આરોપો સાબિત કરવા માટે ચાર સરકારી સાક્ષીઓની તપાસ કરવામાં આવી હતી, જેમાં ખુદ ભોગ બનનાર પીડિતા, તેની માતા અને પડોશીનો સમાવેશ થતો હતો. બચાવ પક્ષે દલીલ કરી હતી કે ૨૦૨૨માં એફઆઈઆર નોંધવામાં બિનજરૂરી વિલંબ થયો હતો અને વારંવાર થતા હુમલાઓની ચોક્કસ તારીખો ગાયબ છે.

જોકે, પીડિતાના જન્મ પ્રમાણપત્ર અને શાળા છોડ્યાના પ્રમાણપત્ર પર ભરોસો રાખીને અદાલતે ચકાસણી કરી હતી કે અત્યાચારના મોટાભાગના સમયગાળા દરમિયાન પીડિતા ૧૮ વર્ષથી ઓછી વયની 'બાળકી' હતી, જેના કારણે તેની કાયદાકીય સંમતિનું કોઈ મૂલ્ય રહેતું નથી. ન્યાયાધીશે અવલોકન કર્યું હતું કે રેકોર્ડ પરના પુરાવા સ્પષ્ટપણે સાબિત કરે છે કે પીડિતા આ ભ્રમણામાં હતી કે આરોપી તેની સાથે લગ્ન કરશે, જેના કારણે તેણે આ સંબંધ અને વારંવારની શારીરિક નિકટતાને પોતાના માતા-પિતાથી છુપાવી રાખી હતી.

અદાલતે એમ પણ જણાવ્યું હતું કે અવિવાહિત યુવતીની સામાજિક પ્રતિષ્ઠા, માન-સન્માન અને ભવિષ્યને ધ્યાનમાં રાખીને પોલીસનો સંપર્ક કરતા પહેલા પરિવારે જે વિચારણા કરી તે કુદરતી અને સમજી શકાય તેવી છે. અદાલતે એ બાબતની પણ નોંધ લીધી હતી કે આ કેસમાં કોઈ ક્રૂર બળ, શારીરિક ઈજા કે પૂર્વઆયોજિત જાતીય શિકારના કોઈ પુરાવા મળ્યા નથી.

અદાલતે સ્પષ્ટ કર્યું હતું કે ૧૮ વર્ષથી નીચેની સગીર વય હોવાને કારણે પીડિતાની સંમતિ કાયદાકીય રીતે અસરહીન બને છે અને દોષિત ઠેરવવાનું અનિવાર્ય બને છે, પરંતુ રોમાન્ટિક પૃષ્ઠભૂમિ એ સજા કરવામાં એક મહત્વપૂર્ણ અને આકર્ષક હળવાશભર્યું પરિબળ બની રહે છે. આખરે અદાલતે દોષિત શખસને 20 વર્ષની સખત કેદની સજા ફટકારી હતી અને તેની સાથે ₹૫,૦૦૦નો દંડ પણ ફટકાર્યો હતો.