એનટીપીસી વર્ષ ૨૦૩૨ સુધીમાં ૧૪૯ ગીગાવોટ વીજ ક્ષમતા હાંસલ કરશે

બિઝનેસ સ્ટાન્ડર્ડના અહેવાલ મુજબ, દેશની સૌથી મોટી વીજ ઉત્પાદન કંપની એનટીપીસી દ્વારા વર્ષ ૨૦૩૨ સુધીમાં ૧૪૯ ગીગાવોટ વીજ ક્ષમતા સુધી પહોંચવા માટે ૫૮ ગીગાવોટ ક્ષમતા ઉમેરવાની તૈયારીઓ કરવામાં આવી રહી છે. એનટીપીસી અને એનટીપીસી ગ્રીનના ચેરમેન અને મેનેજિંગ ડિરેક્ટર ગુરદીપ સિંહે મંગળવારે કેપીએમજી એનરિચ ૨૦૨૬ કાર્યક્રમમાં સંબોધન કરતા આ અંગેની જાણકારી આપી હતી.

ગુરદીપ સિંહે જણાવ્યું હતું કે રિન્યુએબલ્સ સહિતના વિવિધ સ્ત્રોતોમાંથી નવી ક્ષમતાઓનો ઉમેરો કરવામાં આવશે. સત્ર દરમિયાન તેમણે પરમાણુ ક્ષેત્ર માટેની એનટીપીસીની યોજનાઓ પણ રજૂ કરી હતી. વર્તમાન સમયમાં કંપનીની કુલ વીજ ઉત્પાદન ક્ષમતા ૯૧ ગીગાવોટ છે અને ૨૦૩૨ સુધીમાં તે ૧૪૯ ગીગાવોટ સુધી પહોંચી જશે.

ગુરદીપ સિંહે નોંધ્યું હતું કે કંપનીને ખૂબ જ સ્પષ્ટ દિશાનિર્દેશો મળ્યા છે અને હવે પરમાણુ ક્ષમતા વધારવા માટે ઝડપથી કામ થઈ રહ્યું છે. વર્ષ ૨૦૩૭ માટે નિર્ધારિત ૨૫૦ ગીગાવોટ ક્ષમતામાંથી આશરે ૩૦ ગીગાવોટ પરમાણુ ઊર્જાનું આયોજન છે. અહેવાલ અનુસાર, મધ્યપ્રદેશ, બિહાર અને ઓડિશામાં સૂચિત પરમાણુ ક્ષમતાઓ માટે સંભવિતતા અભ્યાસ પૂરો થઈ ગયો છે અને અન્ય રાજ્યોમાં પણ વધુ સ્થળોની શોધખોળ કરવામાં આવશે.

દેશના ઘરેલુ વીજ ક્ષેત્ર વિશે આગળ વાત કરતા ચેરમેને જણાવ્યું હતું કે તે વૈશ્વિક સ્તરના વર્તમાન પડકારો સામે મજબૂતાઈ બતાવી રહી છે. વૈશ્વિક સ્તરે ચાલી રહેલી ઉથલપાથલ છતાં ભારતમાં વીજળીના ભાવમાં કોઈ મોટો ઉછાળો જોવા મળ્યો નથી, જે દુનિયાના અન્ય ભાગોમાં જોવા મળ્યો છે. તેમણે એ પણ નોંધ્યું કે આ વર્ષે ઓક્ટોબર મહિનામાં વીજ માંગમાં ૨૧ ટકાનો વધારો થયો છે અને દર મહિને માંગ વધી રહી છે.

કેન્દ્રીય મંત્રાલય હેઠળ કાર્યરત એનટીપીસી દેશની સૌથી મોટી વીજ ઉત્પાદન કંપની છે જે એકલી જ દેશની એક ચોથા ભાગની ઊર્જાની માંગ પૂરી કરે છે.