EPFO દ્વારા વોટ્સએપ સેવાઓ અને બંધ ખાતાઓના ઓટોમેટિક સેટલમેન્ટની શરૂઆત

એમ્પ્લોયી પ્રોવિડન્ટ ફંડ ઓર્ગેનાઈઝેશન (EPFO) એ તેના કરોડો પીએફ ખાતાધારકો માટે નિયમો અને સુવિધાઓને વધુ સરળ બનાવવા માટે મહત્વપૂર્ણ પગલાં લીધા છે. કેન્દ્રીય શ્રમ અને રોજગાર મંત્રી મનસુખ માંડવિયાએ રવિવારે EPFO ના ૭૪મા સ્થાપના દિવસ નિમિત્તે બે મોટી સુવિધાઓની શરૂઆત કરી હતી. આ નવી સુવિધાઓમાં વોટ્સએપ સેવાઓ અને બંધ અથવા ડાયસેક્ટિવ EPF ખાતાઓનું ઓટોમેટિક સેટલમેન્ટ એટલે કે પૈસાનું આપમેળે ટ્રાન્સફર થવાની વ્યવસ્થાનો સમાવેશ થાય છે.

દૈનિક ભાસ્કરના અહેવાલ મુજબ, હવે પીએફ ખાતાધારકો EPFO ના વેરિફાઇડ વોટ્સએપ નંબર દ્વારા સીધી રીતે અનેક સુવિધાઓ મેળવી શકશે. આ વોટ્સએપ સેવાઓ હેઠળ ખાતાધારકો તેમનું પીએફ બેલેન્સ ચેક કરી શકશે, છેલ્લા ૫ વ્યવહારોની વિગતો મેળવી શકશે અને પાસબુકની માહિતી પણ જોઈ શકશે. આ ઉપરાંત, પ્રધાનમંત્રી વિકસિત ભારત રોજગાર યોજના (PMVBRY) ને લગતી જરૂરિયાતો પૂરી કરવા માટે વોટ્સએપ પર પર્સનલ ગાઈડન્સ અને મદદ પણ ઉપલબ્ધ કરાવવામાં આવશે.

શ્રમ મંત્રાલયના નિવેદન અનુસાર, આ વોટ્સએપ સેવાઓ શરૂ કરવાનો મુખ્ય હેતુ રોજિંદી અને નિયમિત સેવાઓને એક જાણીતા મોબાઈલ પ્લેટફોર્મ દ્વારા સુલભ બનાવવાનો છે. આનાથી પીએફ ખાતાધારકોને નાની-નાની માહિતી મેળવવા માટે વારંવાર EPFO ની કચેરીઓના ધક્કા ખાવાની જરૂરિયાત ઘણી હદે ઓછી થઈ જશે.

સ્થાપના દિવસના અવસરે મંત્રીએ એલિજિબલ ડાયસેક્ટિવ EPF ખાતાઓના ઓટોમેટિક સેટલમેન્ટ સિસ્ટમનું પણ લોન્ચિંગ કર્યું છે. આ સિસ્ટમ હેઠળ એવા ઇનઓપરેટિવ પીએફ ખાતાઓમાં, જેમાં ₹૧,૦૦૦ સુધીની રકમ બાકી છે અને જેમના આધાર કાર્ડ વેરિફાઇડ છે, તેમને હવે ક્લેમ ફોર્મ ભરવાની જરૂર રહેશે નહીં. જ્યારે કોઈ પીએફ ખાતામાં સતત ૩૬ મહિના સુધી કોઈ નવું યોગદાન આવતું નથી અથવા કર્મચારી નિવૃત્તિ પછી પોતાના પૈસા ઉપાડી લેતા નથી, ત્યારે આવા ખાતાઓને 'ઇનઓપરેટિવ' માનવામાં આવે છે. નવા નિયમો મુજબ, હવે ₹૧,૦૦૦ સુધીના બેલેન્સ ધરાવતા આધાર-લિંક્ડ ખાતાઓને આપમેળે સેટલ કરવામાં આવશે.

આ ઓટોમેટિક સેટલમેન્ટની પ્રક્રિયા કેવી રીતે કામ કરશે તે અંગે માહિતી આપતા જણાવવામાં આવ્યું છે કે, EPFO નિર્ધારિત ઓળખ અને બેંક-ખાતાના વેરિફિકેશન પછી જાતે જ આ ખાતાઓના સેટલમેન્ટની પ્રક્રિયા શરૂ કરશે. આ પ્રક્રિયા દ્વારા સાચા લાભાર્થીઓના બેંક ખાતામાં તેમની બાકી રકમ સીધી ટ્રાન્સફર કરી દેવામાં આવશે. આ નવી વ્યવસ્થાથી અંદાજે ૧ લાખ પીએફ ખાતાધારકોને ફાયદો થવાની અપેક્ષા છે, જેના દ્વારા કુલ ₹૫ કરોડની રકમ ટ્રાન્સફર કરવામાં આવશે.

EPFO ની વર્તમાન નાણાકીય સ્થિતિ વિશે વાત કરતા કેન્દ્રીય મંત્રી મનસુખ માંડવિયાએ જણાવ્યું હતું કે, EPFO તેના ૭૪ વર્ષના સફરમાં દેશના વર્કફોર્સ માટે એક વિશ્વસનીય સંસ્થા તરીકે ઉભરી આવ્યું છે. હાલમાં EPFO પાસે ૮ કરોડથી વધુ સભ્યોના યોગદાનથી જમા થયેલું કુલ ₹૩૨ લાખ કરોડનું કોર્પસ ઉપલબ્ધ છે.

કેન્દ્રીય મંત્રીએ EPFO ના કર્મચારીઓ અને અધિકારીઓને પણ જરૂરી સૂચનાઓ આપી હતી. તેમણે કહ્યું કે EPFO ટૂંક સમયમાં જ તેના ૭૫મા વર્ષમાં પ્રવેશ કરવા જઈ રહ્યું છે. આ સંદર્ભમાં, અધિકારીઓએ કર્મચારીઓની સુવિધા માટે નવી ટેકનોલોજી અને ઇનોવેશન એટલે કે નવા સંશોધનો પર ધ્યાન આપવું જોઈએ, જેથી બદલાતા સમય સાથે લોકોને સેવાઓ વધુ સરળતાથી મળી શકે.