દિવાળીની ખરીદી ટાણે મહેસાણા અર્બન બેંકમાં નવી નોટો ખૂટતા સર્જાઈ અરાજકતા

દિવાળીના તહેવારની ધમાકેદાર શરૂઆત અગાઉ નવી અને છૂટી ચલણી નોટો મેળવવા માટે મહેસાણા શહેરમાં આવેલી મહેસાણા અર્બન બેંક ખાતે વહેલી સવારે લોકોની ભીડ ઉમટી હતી. સંદેશ અહેવાલ મુજબ તહેવારો દરમિયાન શુકન તરીકે નવી નોટો વાપરવાની પરંપરા તેમજ ખરીદી અને વ્યવહારો માટે સામાન્ય નાગરિકોને નાની નોટોની ખાસ જરૂરિયાત હોવાથી મોટી સંખ્યામાં લોકો બેંક પર પહોંચ્યા હતા.

બેંકનું મુખ્ય દરવાજો ખૂલતાની સાથે જ લોકોના ટોળેટોળા ઉમટ્યા હતા અને તુરંત જ લાઈનો લાગી ગઈ હતી. થોડા જ સમયમાં બેંકની આગળની કતારો એક કિલોમીટર લાંબી થઈ ગઈ હતી. પરિસ્થિતિ એવી સર્જાઈ હતી કે બેંકની અંદરથી શરૂ થયેલી લાઈનો બહાર મુખ્ય રસ્તા સુધી પહોંચી ગઈ હતી અને દૂર-દૂર સુધી રસ્તા પર માત્ર લોકોની કતારો જ નજરે પડતી હતી.

તહેવારોના દિવસોમાં છૂટા પૈસાની ભારે માંગના કારણે લોકો પોતાની વાર માટે કલાકો સુધી રાહ જોતા જોવા મળ્યા હતા. લોકો દશ, વીસ, પચાસ અને સો રૂપિયાની ચલણી નોટોના બંડલ મેળવવા માટે સવારથી જ બેંક પરિસરમાં હાજર રહ્યા હતા.