દિવાળી પહેલાં અમૂલે ઘી અને માખણના ભાવમાં કર્યો વધારો

કેપિટલ ક્રાંતિના અહેવાલ મુજબ, દેશની સૌથી મોટી સહકારી દૂધ ઉત્પાદક સંઘ એવી અમૂલ દ્વારા દિવાળીના તહેવાર પહેલાં ઘી અને માખણના ભાવમાં વધારો કરવામાં આવ્યો છે. અમૂલ દ્વારા આ ભાવવધારો ૪ નવેમ્બર ૨૦૨૬ના રોજ કરવામાં આવ્યો છે, જેમાં ઘી અને માખણના ભાવમાં ₹૩ થી પ૦ સુધીનો વધારો ઝીંકવામાં આવ્યો છે.

ઉપલબ્ધ માહિતી અનુસાર, અમૂલ ઘીના એક કિલોગ્રામના પેકેટની કિંમત ₹૬૩૦ થી વધારીને ₹૬૮૦ કરવામાં આવી છે, જે સીધો પ૦ રૂપિયાનો વધારો દર્શાવે છે. આ ઉપરાંત, માખણના ૧૦૦ ગ્રામના પેકેટનો ભાવ ₹૬૩ થી વધીને ₹૬૬ થયો છે, જ્યારે ૫૦૦ ગ્રામના માખણના પેકેટની કિંમતમાં ₹૧૫ નો વધારો થવાથી તે ₹૩૧૦ થી વધીને ₹૩૨૫ પર પહોંચી ગયું છે.

આ ભાવવધારા પાછળ ગુજરાત અને રાજસ્થાનમાં નકલી ઘી સામે કરવામાં આવેલી કાર્યવાહી છે, જેના કારણે બજારમાં માગમાં મોટો વધારો થયો છે. સાથેસાથે બજારમાં અમૂલ ગાયના ઘીની પૂરતી આવક ન થવાને કારણે તેની અછત સર્જાઈ છે. કેટલાક શહેરોમાં અમૂલ ગાયનું ઘી સરળતાથી ઉપલબ્ધ ન હોવાને કારણે ગ્રાહકોને દિવાળી પહેલાં જ મોંઘવારી અને માલની અછતનો સામનો કરવો પડી રહ્યો છે.

આ નવા ભાવવધારાને કારણે સપ્ટેમ્બર ૨૦૨૫માં જીએસટીના ઘટાડાથી ગ્રાહકોને મળેલા ફાયદા અને તેની અસરો હવે નાબૂદ થઈ ગઈ છે. સપ્ટેમ્બર ૨૦૨૫માં ડેરી ઉત્પાદનો પરનો જીએસટી ૧૨ ટકાથી ઘટાડીને ૫ ટકા કરવામાં આવ્યો હતો, ત્યારબાદ અમૂલે પોતાના ૭૦૦ જેટલા ડેરી ઉત્પાદનોના ભાવ ઘટાડ્યા હતા. તે સમયે જીએસટી ઘટવાને કારણે અમૂલના એક લિટર ઘીના કાર્ટનની કિંમત ₹૬૫૦ થી ઘટીને ₹૬૧૦ થઈ હતી.

તે જ રીતે, સપ્ટેમ્બર ૨૦૨૫ના જીએસટી ઘટાડા બાદ ૫ લિટર ઘીનો ભાવ ₹૩,૨૭૫ થી ઘટીને ₹૩,૦૭૫ થયો હતો, ૧૦૦ ગ્રામ માખણના પેકેટનો ભાવ ₹૬૨ થી ઘટીને ₹૫૮ પર આવ્યો હતો અને અડધા કિલોગ્રામ ઘીનો ભાવ ₹૩૦૫ થી ઘટીને ₹૨૮૫ થયો હતો. હવે આ તમામ રાહતો બાદ અમૂલ દ્વારા કરવામાં આવેલા તાજેતરના ભાવવધારાથી ગ્રાહકો પર આર્થિક બોજ ફરી વધ્યો છે.