બાલ્ટિક સમુદ્રમાં ટેલિકોમ કેબલને નુકસાન પહોંચાડવા બદલ જહાજના ક્રૂને સજા

હેલસિંકીની જિલ્લા કોર્ટે ગુલફ ઓફ ફિનલેન્ડમાં બે સબસી ટેલિકોમ્યુનિકેશન કેબલ્સને નુકસાન પહોંચાડવા બદલ કાર્ગો શિપ 'ફિટબર્ગ'ના રશિયન કેપ્ટન અને અઝરબૈજાની ક્રૂ મેમ્બરને ગંભીર તોડફોડના આરોપમાં જેલની સજા સંભળાવી છે. કોર્ટે કેપ્ટનને ૩ વર્ષ અને ૬ મહિના તથા ક્રૂ મેમ્બરને ૨ વર્ષ અને ૧૦ મહિનાની કેદની સજા કરી છે.

કોર્ટના નિવેદન મુજબ, આ બંને વ્યક્તિઓએ જાણી જોઈને જહાજની એન્કર ચેઈન અને એન્કર શેન્કને સમુદ્રના તળિયે આશરે ૧૩૦ કિમી સુધી ઘસડ્યું હતું, જેના કારણે કેબલ્સને નુકસાન થયું હતું. આ ઘટનાના સંદર્ભમાં કોર્ટે બંને આરોપીઓને સંયુક્ત રીતે આશરે €૧.૯ મિલિયન નુકસાન ભરપાઈ કરવાનો આદેશ આપ્યો છે, જ્યારે કેપ્ટનને અલગથી વધારાના €૮૫,૦૦૦ ચૂકવવાનો આદેશ થયો છે.

સ્ટ્રેટ્સ ટાઈમ્સના અહેવાલ મુજબ, ફિનલેન્ડ દ્વારા ૩૧ ડિસેમ્બરે આ જહાજને જપ્ત કરવામાં આવ્યું હતું. તે સમયે જહાજ રશિયાથી ઇઝરાયેલ જઈ રહ્યું હતું અને તેના પર હેલસિંકીથી એસ્ટોનિયા સુધીના કેબલ્સને નુકસાન પહોંચાડવાની શંકા હતી. સેન્ટ વિન્સન્ટ અને ગ્રેનાડાઇન્સના ધ્વજ હેઠળ ચાલતું આ જહાજ રશિયાના સેન્ટ પીટર્સબર્ગ પોર્ટથી નીકળ્યું હતું. તપાસકર્તાઓએ જણાવ્યું કે જહાજ પર રશિયા, જ્યોર્જિયા, કઝાકિસ્તાન અને અઝરબૈજાનના ૧૪ ક્રૂ મેમ્બર્સ હતા. જહાજને હવે મુક્ત કરી દેવામાં આવ્યું છે.

આરોપીઓએ કોઈપણ ખોટું કામ કરવાનો ઇનકાર કર્યો છે અને આ કેસમાં ફિનલેન્ડના અધિકારક્ષેત્રને પડકાર્યું છે. વકીલોના જણાવ્યા અનુસાર, કેપ્ટન આ ચુકાદા સામે અપીલ કરશે, જ્યારે ક્રૂ મેમ્બરે હજુ નિર્ણય લીધો નથી. ટ્રાવેલ બેન હોવાને કારણે બંને આરોપીઓ ફિનલેન્ડમાં જ રોકાયેલા છે.

૨૦૨૨થી બાલ્ટિક સમુદ્રમાં કેબલ્સ અને પાઈપલાઈનોને અસર કરતી અનેક ઘટનાઓ બની છે, જેના કારણે ફિનલેન્ડે તેના સમુદ્રતળના ઈન્ફ્રાસ્ટ્રક્ચરની સુરક્ષા વધારી છે. આ પ્રયાસોના ભાગરૂપે સપ્ટેમ્બરમાં જહાજ-બોર્ડિંગ ડ્રિલ પણ કરવામાં આવ્યું હતું.