મનસુખ માંડવિયા અને બોરિસ વાન ડર વોરસ્ટે લોસ એન્જલસ 2૦૨૮ ઓલિમ્પિક માટે કરી ચર્ચા

બિઝનેસ સ્ટાન્ડર્ડના અહેવાલ મુજબ, વર્લ્ડ બોક્સિંગના પૂર્વ પ્રમુખ બોરિસ વાન ડર વોરસ્ટે નવી દિલ્હીમાં ગુરુવારે કેન્દ્રીય યુવા બાબતો અને રમતગમત મંત્રી મનસુખ માંડવિયા તેમજ બોક્સિંગ ફેડરેશન ઓફ ઇન્ડિયા (બીએફઆઇ) ના પ્રમુખ અજય સિંહ સાથે મુલાકાત કરી હતી. આ બેઠક દરમિયાન મુખ્યત્વે ભારતમાં બોક્સિંગની પ્રગતિ અને લોસ એન્જલસ ૨૦૨૮ ઓલિમ્પિક્સ માટેની તૈયારીઓ પર ચર્ચા કરવામાં આવી હતી. આ બેઠકમાં મંત્રી મનસુખ માંડવિયાએ બીએફઆઇ અને તેના નેતૃત્વ પર સરકારનો વિશ્વાસ ફરીથી વ્યક્ત કર્યો હતો અને મુખ્ય આંતરરાષ્ટ્રીય સ્પર્ધાઓમાં ભારતના તાજેતરના પ્રદર્શનને આગળ વધારીને તેને ઓલિમ્પિક પદકોમાં પરિવર્તિત કરવાની જરૂરિયાત પર ભાર મૂક્યો હતો.

બોરિસ વાન ડર વોરસ્ટે ઇન્સ્ટાગ્રામ પર આ બેઠકની વિગતો શેર કરતા જણાવ્યું હતું કે મંત્રીએ ફેડરેશન, ભારતીય બોક્સરો અને પ્રમુખ અજય સિંહ માટે મજબૂત સમર્થન વ્યક્ત કર્યું હતું. તેમણે ભારપૂર્વક જણાવ્યું કે સરકાર અને દેશની ૧.૪ અબજની વસ્તી તેમની મહત્ત્વાકાંક્ષાઓ પાછળ સંપૂર્ણપણે ઊભી છે. વાન ડર વોરસ્ટે ઉમેર્યું કે મંત્રી ભારતીય બોક્સિંગ દ્વારા તાજેતરના વર્ષોમાં થયેલી અદ્ભુત પ્રગતિ અને આંતરરાષ્ટ્રીય બોક્સિંગ મંચ પર ભારતના એક મોટી શક્તિ તરીકે ઉભરી આવવાને લઈને ઉત્સાહી હતા. એશિયન ગેમ્સ અને કોમનવેલ્થ ગેમ્સમાં મળેલી ઐતિહાસિક પદક જીતે આ વિશ્વાસને વધુ મજબૂત બનાવ્યો છે કે ભારત પાસે તેની મહત્ત્વાકાંક્ષાઓને ઓલિમ્પિક સફળતામાં ફેરવવાની પ્રતિભા, નિશ્ચય અને ક્ષમતા રહેલી છે.

અહેવાલ મુજબ ભારતે ૨૦૨૬ની એશિયન ગેમ્સમાં બોક્સિંગમાં ઐતિહાસિક અભિયાન પાર પાડતા ત્રણ ગોલ્ડ અને ત્રણ બ્રોન્ઝ સહિત કુલ છ પદકો મેળવ્યા હતા. જેમાં લવલીના બોર્ગોહેન, પરવીણ હૂડા અને અંકુશ પાંઘલે ગોલ્ડ મેડલ જીત્યા હતા, જ્યારે પ્રિયા ઘાંગસ, કપિલ પોખરીયા અને નરેન્દર બેરવાલે બ્રોન્ઝ મેડલ પ્રાપ્ત કર્યા હતા. આ ઉપરાંત ગ્લાસગો ખાતે યોજાયેલી ૨૦૨૬ કોમનવેલ્થ ગેમ્સમાં પણ ભારતીય બોક્સિંગ ટુકડીએ સાત ગોલ્ડ અને ત્રણ સિલ્વર સાથે કુલ ૧૦ પદકો જીતીને અત્યાર સુધીનું સર્વશ્રેષ્ઠ પ્રદર્શન કર્યું હતું.

વાન ડર વોરસ્ટે ભારપૂર્વક જણાવ્યું હતું કે તાજેતરની પ્રગતિને ઓલિમ્પિક સફળતામાં બદલવા માટે આ રમત સાથે જોડાયેલા તમામ હિસ્સેદારો જેમાં એથ્લેટ્સ, કોચ, ફેડરેશન, સરકાર અને સમગ્ર બોક્સિંગ સમુદાયના સહિયારા પ્રયાસોની આવશ્યકતા રહેશે. તેમણે ભારતીય બોક્સિંગ સમુદાય માટે મંત્રી માંડવિયાનો સંદેશ પણ ટાંંક્યો હતો, જેમાં ઓલિમ્પિક રમતોની તૈયારી કરી રહેલા એથ્લેટ્સની પાછળ એક થઈને ઊભા રહેવા માટે અપીલ કરવામાં આવી હતી.

મંત્રી માંડવિયાના સંદેશને ટાંકીને જણાવવામાં આવ્યું કે જ્યારે ૨૦૨૮માં ભારતીય બોક્સરો રિંગમાં ઉતરે ત્યારે તેઓ જાણતા હોવા જોઈએ કે આખો દેશ અને એક યુનાઇટેડ બોક્સિંગ સમુદાય તેમની પાછળ મક્કમતાથી ઊભો છે. ભવિષ્ય અનેક શક્યતાઓથી ભરેલું છે અને આ જ સમય છે તે ક્ષમતાને ઓલિમ્પિક ગૌરવમાં ફેરવવાનો. લોસ એન્જલસ ઓલિમ્પિક્સને હવે બે વર્ષથી પણ ઓછો સમય બાકી છે ત્યારે આ બેઠકે ભારતના બોક્સિંગ પ્રોગ્રામને મજબૂત કરવા અને તાજેતરની આંતરરાષ્ટ્રીય સફળતાને ઓલિમ્પિક મંચ સુધી આગળ ધપાવવા પર વિશેષ ધ્યાન કેન્દ્રિત કર્યું હતું.