ચક્રવાત અને પૂરના પ્રકોપને કારણે મુખ્યમંત્રી મોહન માળીએ દીવાળીની ઉજવણી રદ કરી

બિઝનેસ સ્ટાન્ડર્ડના અહેવાલ મુજબ, ઓડિશાના મુખ્યમંત્રી મોહન ચરણ માળીએ રાજ્યના કેટલાક વિસ્તારોમાં ચક્રવાત અર્ણબ અને ત્યારબાદ આવેલા પૂરને કારણે થયેલા નુકસાન તથા વેઠેલી મુશ્કેલીઓને ધ્યાનમાં રાખીને આ વર્ષે પોતાના નિવાસસ્થાને દીવાળીની ઉજવણી રદ કરી દીધી છે.

મુખ્યમંત્રી કાર્યાલય (સીએમઓ) દ્વારા જારી કરવામાં આવેલા એક નિવેદનમાં જણાવવામાં આવ્યું છે કે મુખ્યમંત્રીના નિવાસ્થાને થનારી દીવાળીની ઉજવણી મોકૂફ રાખવામાં આવી છે. આ અવસર પર મુખ્યમંત્રીએ લોકોને પોતાના નિવાસ્થાને ભેટ અથવા ગુલદસ્તા લઈને ન આવવા માટે પણ અનુરોધ કર્યો છે.

સીએમઓ દ્વારા સોશિયલ મીડિયા પ્લેટફોર્મ એક્સ પર કરવામાં આવેલી એક પોસ્ટમાં કહેવામાં આવ્યું છે કે માનનીય મુખ્યમંત્રીએ લોકોને પ્રભાવિત ક્ષેત્રોની જનતા પ્રત્યે સંવેદનશીલ રહેવા અને આ આપત્તિથી પ્રભાવિત થયેલા લોકોને મદદનો હાથ લંબાવવા અપીલ કરી છે.

અગાઉ, ઓક્ટોબરમાં ભારે વરસાદને કારણે પાકનું નુકસાન સહન કરનાર ખેડૂતોની એકતાના પ્રતિક રૂપે મુખ્યમંત્રી માળીએ દુર્ગાપૂજાની ઉજવણી પણ છોડી દીધી હતી અને તેઓ પૂજા પંડાલોની મુલાકાત લેવાથી દૂર રહ્યા હતા.

ચક્રવાત અર્ણબના કારણે થયેલા ભારે વરસાદ અને પૂરના પ્રકોપથી રાજ્યના દક્ષિણી જિલ્લાઓ સૌથી વધુ પ્રભાવિત થયા છે, જેના કારણે હજારો લોકો વિસ્થાપિત થયા છે અને સંપત્તિ તથા પાકને વ્યાપક નુકસાન પહોંચ્યું છે.