દિવાળી પર ૭ દિવસની રજા આપનાર ઇન્દોરની સ્ટાર્ટઅપ કંપની વાયરલ

સંદેશ (દેશ) અહેવાલ મુજબ, ઇન્દોર સ્થિત એક ડિજિટલ માર્કેટિંગ સ્ટાર્ટઅપ કંપનીએ તેના કર્મચારીઓને પરિવાર અને મિત્રો સાથે સારો સમય વિતાવવા માટે દિવાળીના તહેવાર નિમિત્તે ૭ દિવસની રજા આપી હતી.

કંપનીના સહ-સ્થાપક યશ કુલશ્રેષ્ઠએ આ રજાના આયોજન વિશે લિંક્ડઇન પર એક પોસ્ટ શેર કરી હતી, જે ખૂબ જ ઝડપથી સોશિયલ મીડિયા પર વાયરલ થઈ ગઈ હતી.

આ પોસ્ટ વાયરલ થયા બાદ કંપનીને માત્ર ૨૪ કલાકની અંદર જ ૨૫૦થી વધુ નોકરી માટેની અરજીઓ પ્રાપ્ત થઈ હતી. ખાસ વાત એ છે કે આ અરજી કરનારાઓમાં માત્ર ઇન્ટર્ન જ નહીં, પરંતુ ઓપરેશન્સ હેડ અને સી.એક્સ.ઓ. સ્તરના અનુભવી વ્યાવસાયિકો પણ સામેલ હતા.

આ રજાઓ અને તહેવારના માહોલ વચ્ચે, ૪ નવેમ્બરના રોજ ઓફિસમાં હાજર તમામ કર્મચારીઓને મીઠાઈઓ અને દિવાળીની ભેટો આપવામાં આવી હતી. ત્યારબાદ ૫ અને ૬ નવેમ્બરના રોજ કર્મચારીઓને ઘરેથી કામ કરવાની એટલે કે વર્ક ફ્રોમ હોમની છૂટ આપવામાં આવી હતી.