પાટણ અકસ્માતમાં ઈજાગ્રસ્ત બે ભાઈઓને ૨૮.૮૦ લાખ વળતર ચૂકવવાનો આદેશ

પાટણની વળતર ટ્રિબ્યુનલે એક માર્ગ અકસ્માતમાં ઈજાગ્રસ્ત થયેલા બે સગા ભાઈઓને કુલ ₹૨૮.૮૦ લાખનું વળતર ચૂકવવાનો હુકમ કર્યો છે. સંદેશના અહેવાલ મુજબ, આ અકસ્માત ૨૦૨૪ના જાન્યુઆરી મહિનામાં થયો હતો.

મૂળ રાજસ્થાનના અને ધાનેરાના વિંછીવાડીમાં રહેતા માંગલારામ તેજારામ ભીલ અને રમેશકુમાર તેજારામ ભીલ બાઈક પર ધાનેરા બજાર તરફ જઈ રહ્યા હતા. તે સમયે સામેથી આવતી સ્વિફ્ટ કારે તેમને અડફેટે લીધા હતા. આ ઘટનામાં બાઈક ચાલક માંગલારામના જમણા પગે ગંભીર ઈજા થઈ હતી, જેના કારણે ઢીંચણથી નીચેનો ભાગ કાપવો પડ્યો હતો. જ્યારે પાછળ સવાર રમેશકુમારના માથાના ભાગે ગંભીર ઈજાઓ પહોંચી હતી.

કોર્ટે તમામ પુરાવાઓની તપાસ કરીને સ્વિફ્ટ કારના ચાલકની સંપૂર્ણ બેદરકારી ગણાવી હતી. ટ્રિબ્યુનલે માંગલારામને ₹૨૦.૯૩ લાખ અને રમેશકુમારને ₹૭.૮૭ લાખ ચૂકવવાનો આદેશ આપ્યો છે. આ રકમ અરજી દાખલ કર્યાની તારીખથી ૯ ટકા વ્યાજ અને કોર્ટ ખર્ચ સાથે ચૂકવવાની જવાબદારી કારના માલિક અને ઈન્સ્યોરન્સ કંપનીને સંયુક્ત રીતે સોંપવામાં આવી છે.