દિવાળી અને છઠ્ઠ પૂજા માટે ઉધનાથી ૯ વિશેષ ટ્રેનો શરૂ કરાઈ

દિવાળી અને આસ્થાના પર્વ છઠ્ઠ પૂજાના તહેવારો નજીક આવતા સુરતના ઉધના રેલવે સ્ટેશન પર મુસાફરોનો ભારે ધસારો જોવા મળી રહ્યો છે. ટેક્સટાઇલ અને હીરા ઉદ્યોગ સાથે જોડાયેલા પરપ્રાંતીય શ્રમિકો અને તેમના પરિવારો વતન જવા માટે ઉધના સ્ટેશન પર મોટી સંખ્યામાં એકત્રિત થઈ રહ્યા છે. સ્ટેશનના પરિસર અને પ્લેટફોર્મ પર મુસાફરોની એટલી મોટી સંખ્યા જોવા મળી રહી છે કે જાણે મુસાફરોનો મહાસાગર ઊમટ્યો હોય તેવો માહોલ સર્જાયો છે.

નિયમિત ટ્રેનોમાં લાંબુ વેઇટિંગ હોવાને કારણે પશ્ચિમ રેલવે દ્વારા ઉત્તર પ્રદેશ અને બિહાર તરફ જનારા પ્રવાસીઓ માટે ૯ વિશેષ (ફેસ્ટિવલ સ્પેશિયલ) ટ્રેનો ચલાવવાનો નિર્ણય લેવામાં આવ્યો છે. આ વિશેષ ટ્રેનો પટના, દાનાપુર, ગોરખપુર, વારાણસી અને છપરા તરફ જનારા મુસાફરો માટે કાર્યરત કરવામાં આવી છે. ગઈકાલ સાંજથી જ આ વિશેષ ટ્રેનોનું સંચાલન નિર્ધારિત શેડ્યૂલ મુજબ તબક્કાવાર શરૂ કરી દેવામાં આવ્યું છે, જેથી સ્ટેશન પર એકસાથે ભીડ ન થાય અને અફરાતફરીની સ્થિતિ સર્જાય નહીં. આ ટ્રેનોના સંચાલનથી મુસાફરો અને રેલવે પ્રશાસન બંનેને મોટી રાહત મળી છે.

પશ્ચિમ રેલવેના જણાવ્યા અનુસાર, તહેવારો દરમિયાન મુસાફરોને સરળ, સુવિધાજનક અને સુરક્ષિત મુસાફરીનો અનુભવ મળે તે માટે વિશેષ તૈયારીઓ કરવામાં આવી છે. મુસાફરોને કતારબદ્ધ રીતે ટ્રેનમાં પ્રવેશ મળે અને કોઈ અનિચ્છનીય ઘટના ન બને તે માટે સ્ટેશન પર ચુસ્ત પોલીસ પહેરો ગોઠવવામાં આવ્યા છે. રેલવે તંત્રનો મુખ્ય હેતુ ભીડનું યોગ્ય સંચાલન કરીને અવરજવર સુવ્યવસ્થિત રાખવાનો અને દરેક મુસાફર પોતાના ગંતવ્ય સ્થાને સુરક્ષિત રીતે પહોંચી શકે તે સુનિશ્ચિત કરવાનો છે.

મુસાફરોની વધતી સંખ્યાને ધ્યાનમાં રાખીને ઉધના સ્ટેશન પર નવા અને આધુનિક વિશાળ હોલ્ડિંગ એરિયા તેમજ યાત્રી સુવિધા કેન્દ્રની વ્યવસ્થા કરવામાં આવી છે. આ સુવિધા કેન્દ્રમાં મુસાફરો માટે બાથરૂમ, વોશબેસિન અને શૌચાલયની વિશેષ વ્યવસ્થા કરવામાં આવી છે. યાત્રી સુવિધા કેન્દ્રમાં પુરુષો અને મહિલાઓ માટે અલગ-અલગ શૌચાલયની સુવિધા ઉપલબ્ધ કરાવાઈ છે. આ આધુનિક સુવિધાઓ દ્વારા મુસાફરો ભીડ વચ્ચે પણ આરામદાયક રીતે ટ્રેનની રાહ જોઈ શકશે અને યોગ્ય માર્ગદર્શન મેળવી શકશે.