ગોકાક ધોધ પર લગ્નની ચર્ચા કરવા ગયેલી યુવતીની પ્રેમીએ કરી હત્યા

કર્ણાટકમાં એક ચોંકાવનારી ઘટના સામે આવી છે જ્યાં લગ્નની વાતચીત કરવાના બહાને પ્રેમિકાને ગોકાક ધોધ લઈ જઈને તેની હત્યા કરી નાખવામાં આવી હોવાનું એનડીટીવીના અહેવાલમાં જણાવવામાં આવ્યું છે. રક્ષિતા સરિકાર નામના ૨૩ વર્ષીય યુવતી અને તેના પ્રેમી વચ્ચે છેલ્લા ચાર વર્ષથી પ્રેમ સંબંધ ચાલતો હતો અને પ્રેમીએ તેની સાથે લગ્ન કરવાનું વચન આપ્યું હતું, પરંતુ આ બાબતે તેમની વચ્ચે અવારનવાર ઝઘડા થતા હતા. આ હત્યાકાંડ આચરનાર આરોપી ૨૯ વર્ષીય બસપ્પા સતાન્નવર બેલાગવી જિલ્લાનો વતની છે અને તે બિહારમાં સશસ્ત્ર સીમા બોલ (SSB) ની ૨૧મી બટાલિયનમાં કન્સ્ટેબલ તરીકે ફરજ બજાવે છે.

અહેવાલો અનુસાર, રક્ષિતા છેલ્લા ચાર વર્ષથી તેના પ્રેમી દ્વારા લગ્નનું વચન પૂરું કરવાની રાહ જોઈ રહી હતી પરંતુ તેમનું ભવિષ્ય નક્કી કરવા માટે ગોકાક ધોધની મુલાકાત તેના માટે ઘાતક સાબિત થઈ. ગત ૨૮મી ઓક્ટોબરે બસપ્પા રક્ષિતાને લગ્ન અને ભવિષ્ય અંગે ચર્ચા કરવાના બહાને ગોકાક ફોલ્સ ખાતે લઈને ગયો હતો. આ મુલાકાત દરમિયાન બંને વચ્ચે કોઈ બાબતે ઉગ્ર બોલાચાલી અને દલીલ શરૂ થઈ ગઈ હતી. આ તકરાર એટલી વધી ગઈ કે આરોપી બસપ્પાએ રક્ષિતા પર હુમલો કર્યો, તેના કાન પર પ્રહાર કર્યો અને ત્યારબાદ તેનું ગળું દબાવીને નિર્દયતાપૂર્વક હત્યા કરી નાખી હતી.

યુવતીની હત્યા કર્યા બાદ આરોપીએ તેના મૃતદેહને ધોધની નજીક આવેલા એક ડુંગરાળ વિસ્તારમાં ફેંકી દીધો હતો અને ઘટનાસ્થળેથી ફરાર થઈ ગયો હતો. જ્યારે રક્ષિતા સમયસર પોતાના ઘરે પરત ન ફરી ત્યારે તેના પરિવારજનો ચિંતામાં મુકાયા હતા અને તેની શોધખોળ શરૂ કરી હતી. પરિવારજનોએ લાંબા સમય સુધી ભાળ ન મળતાં ૧લી નવેમ્બરના રોજ પોલીસ મથકે ગુમ થયાની ફરિયાદ નોંધાવી હતી. આ ગુમ થયાના કેસની તપાસ દરમિયાન પોલીસને મહત્વના સુરાગ મળ્યા હતા અને તપાસના અંતે આ ભયાનક હત્યાનો પર્દાફાશ થયો હતો.

પોલીસે કડક પૂછપરછ હાથ ધર્યા બાદ આરોપી બસપ્પાની રક્ષિતાની હત્યા કરવાના આરોપસર ધરપકડ કરી લીધી હતી. પોલીસ તપાસમાં ગુનો સાબિત થયા બાદ તેને ન્યાયિક કસ્ટડીમાં મોકલી આપવામાં આવ્યો છે. આ મા અંગે સ્થાનિક પોલીસ સ્ટેશનમાં સત્તાવાર રીતે ગુનો નોંધી લેવામાં આવ્યો છે અને આ પ્રકરણમાં પોલીસ દ્વારા આગળની વધુ તપાસ ચાલુ રાખવામાં આવી છે જેથી આ ઘટના પાછળના અન્ય કોઈ પાસાઓ હોય તો તે પણ બહાર આવી શકે.