વાપીમાં વિકસિત ભારત યુવા સંવાદ દ્વારા યુવાનોને મતદાન પ્રત્યે જાગૃત કર્યા

પીઆઈબી અમદાવાદના અહેવાલ મુજબ, ભારત સરકારના યુવા બાબતો અને રમતગમત મંત્રાલય હેઠળના મેરા યુવા ભારત (MY Bharat), વલસાડ દ્વારા રાજ્જૂ શ્રોફ રોફેલ યુનિવર્સિટી, વાપી ખાતે ‘વિકસિત ભારત યુવા સંવાદ’ કાર્યક્રમ યોજાયો હતો. આ કાર્યક્રમનો મુખ્ય ઉદ્દેશ્ય યુવાનોને લોકશાહી પ્રક્રિયા સાથે જોડવા, મતદાનના મહત્વ વિશે જાગૃત કરવા અને જનપ્રતિનિધિઓ સાથે તેમનો સીધો સંવાદ કરાવવાનો હતો.

આ પ્રસંગે જિલ્લા પંચાયત પ્રમુખ શ્રીમતી હેતલબેન પટેલ, વાપી મહાનગરપાલિકાના મેયર શ્રીમતી દક્ષાબેન પટેલ, ધરમપુરના ધારાસભ્ય શ્રી અંરવિંદભાઈ પટેલ, જિલ્લા શિક્ષણાધિકારી ડૉ. રાજેશ્રી ટંડેલ અને જિલ્લા યુવા અધિકારી આયુષ ચૌધરી મુખ્ય અતિથિ તરીકે ઉપસ્થિત રહ્યા હતા.

કાર્યક્રમમાં ‘યુવા સંવાદ – નો યોર વોટ’ (Know Your Vote) સત્રનું આયોજન કરવામાં આવ્યું હતું. જેમાં યુવાનોએ જનપ્રતિનિધિઓ સાથે લોકશાહી અને મતદાન અંગે મુક્તપણે ચર્ચા કરી હતી. યુવાનોએ પોતાના વોટની શક્તિ, યોગ્ય પ્રતિનિધિની પસંદગી કરવાની રીત, દેશના વિકાસ પર મતદાનની અસર અને લોકશાહીમાં યુવાનોની ભૂમિકા જેવા મહત્વના પ્રશ્નો પૂછ્યા હતા.

જવાબમાં જનપ્રતિનિધિઓએ મતદાનના અધિકાર, જવાબદારી, નિષ્પક્ષ મતદાન અને જાગૃત નાગરિકતા પર ભાર મૂક્યો હતો. તેમણે યુવાનોને કોઈપણ દબાણ કે લોભ-લાલચ વગર વિવેકબુદ્ધિથી મતદાન કરવા અને અન્ય નાગરિકોને પણ જાગૃત કરવા અનુરોધ કર્યો હતો. આ સંવાદ દ્વારા યુવાનોએ સમજ્યું કે લોકશાહીમાં માત્ર મતદાન જ નહીં, પરંતુ જાગૃત નાગરિક તરીકે સતત ભાગીદારી જરૂરી છે.

મેરા યુવા ભારત, વલસાડ દ્વારા યુનિવર્સિટીના સહયોગથી આયોજિત આ કાર્યક્રમમાં મોટી સંખ્યામાં વિદ્યાર્થીઓ, સ્વયંસેવકો અને યુવાનોએ ઉત્સાહપૂર્વક ભાગ લીધો હતો.