વિદ્યાંજલિ દ્વારા શાળા શિક્ષણ માટે નેશનલ સીએસઆર મીટનું આયોજન

કેન્દ્રીય શિક્ષણ મંત્રાલયના શાળા શિક્ષણ અને સાક્ષરતા વિભાગ (DoSEL) દ્વારા હરિયાણાના ગુરુગ્રામમાં વિદ્યાંજલિ પ્રોગ્રામ હેઠળ નેશનલ કોર્પોરેટ સોશિયલ રિસ્પોન્સિબિલિટી (CSR) મીટનું આયોજન કરવામાં આવ્યું હતું. આ મીટનો મુખ્ય હેતુ શાળા શિક્ષણના પરિવર્તન માટે સરકાર, કોર્પોરેટ સંસ્થાઓ, રાજ્યો, કેન્દ્રશાસિત પ્રદેશો અને અમલીકરણ એજન્સીઓ વચ્ચેના સહયોગને મજબૂત કરવાનો છે.

આ કાર્યક્રમમાં CSR-સ્ટેટ ઇન્ટરેક્શન એક મહત્વપૂર્ણ ભાગ હતો, જેમાં કોર્પોરેટ સંસ્થાઓના પ્રતિનિધિઓ, રાજ્ય નોડલ ઓફિસરો, DoSEL, પ્રોગ્રામ મેનેજમેન્ટ યુનિટ (PMU) અને નેશનલ ઇન્ફોર્મેટિક્સ સેન્ટર (NIC) ના પ્રતિનિધિઓ એકઠા થયા હતા. આ સંવાદ દ્વારા સહયોગના માર્ગો શોધવા, CSR સંસ્થાઓ અને રાજ્યો વચ્ચે નેટવર્કિંગ વધારવા અને શાળાઓની જરૂરિયાતો મુજબ સંભવિત પ્રોજેક્ટ્સ પર ચર્ચા કરવાની તક મળી હતી.

મીટ દરમિયાન વિવિધ રાજ્યો અને કેન્દ્રશાસિત પ્રદેશોએ વિદ્યાંજલિ હેઠળના તેમના અનુભવો અને પહેલો રજૂ કર્યા હતા. આંધ્રપ્રદે વિદ્યાંજલિના અમલીકરણ વિશે, કર્ણાટકે શાળાઓના દત્તક લેવા અંગે, મિઝોરમે સામુદાયિક ભાગીદારીની ભૂમિકા વિશે અને દિલ્હીએ કાર્યક્રમ હેઠળના નવા સંશોધનો અને સંબંધિત પ્રવૃત્તિઓ વિશે પ્રેઝન્ટેશન આપ્યું હતું.

અમલીકરણ એજન્સીઓ જેવી કે ચાઈલ્ડફંડ ઈન્ડિયા, SARD ઈન્ડિયા, ઇન્સ્પાયરિંગ સિનિયર્સ ફાઉન્ડેશન અને ETI ફાઉન્ડાને વિદ્યાંજલિ દ્વારા CSR જોડાણ અને શાળાના વિકાસમાં સહાય કરવાના તેમના અનુભવો અને દ્રષ્ટિકોણ શેર કર્યા હતા. ટેકનિકલ સત્રોમાં સ્ટેટ બેંક ઓફ ઈન્ડિયા (SBI) અને ભારતી એરટેલ જેવી અગ્રણી કોર્પોરેટ સંસ્થાઓના પ્રતિનિધિઓએ શાળા શિક્ષણમાં તેમના યોગદાન વિશે માહિતી આપી હતી. તેમણે શાળાના સંસાધનોને મજબૂત કરવા અને શિક્ષણના વાતાવરણને સુધારવા માટે કોર્પોરેટ ભાગીદારીની ભૂમિકા પર ભાર મૂક્યો હતો.

વિદ્યાંજલિ એ DoSEL ની એક પહેલ છે, જેનો ઉદ્દેશ્ય સામુદાયિક અને ખાનગી ક્ષેત્રના માળખાગત સહયોગ દ્વારા સરકારી અને સરકારી સહાયિત શાળાઓને મજબૂત કરવાનો છે. તે એક ડિજિટલ પ્લેટફોર્મ પૂરું પાડે છે જે સેવાઓ, પ્રવૃત્તિઓ અને સંપત્તિના સ્વરૂપમાં યોગદાન આપવા માટે શાળાઓને સ્વયંસેવકો, સંસ્થાઓ અને CSR ભાગીદારો સાથે જોડે છે. તેના CSR માળખામાં CSR મોડ્યુલ અને એડોપ્ટ-એ-સ્કૂલ મોડ્યુલનો સમાવેશ થાય છે.

આ પ્રસંગે DoSEL ના એડિશનલ સેક્રેટરી અર્ચના શર્મા અવસ્થી, ઇકોનોમિક એડવાઈઝર એ. શ્રીજા અને મંત્રાલયના અન્ય વરિષ્ઠ અધિકારીઓ ઉપસ્થિત રહ્યા હતા.