ઉપરાષ્ટ્રપતિએ જૂના કાયદા રદ કરી કાયદાકીય સુધારાનું આહ્વાન કર્યું

ભારતના ઉપરાષ્ટ્રપતિ શ્રી સી. પી. રાધાકૃષ્ણને વિજ્ઞાન ભવન, નવી દિલ્હી ખાતે ભારતના વિધિ પંચ દ્વારા આયોજિત ‘સહકારી સંઘવાદ અને કાયદાકીય સુધારા: રાષ્ટ્રીય અને રાજ્ય પરિપ્રેક્ષ્ય’ પરિષદનું ઉદ્ઘાટન કર્યું હતું.

સભાને સંબોધતાં તેમણે ‘ટીમ ઈન્ડિયા’ની ભાવના પર ભાર મૂકતાં કેન્દ્ર અને રાજ્યો વચ્ચે વધુ પરામર્શ, સંકલન અને સહિયારી જવાબદારીનું આહ્વાન કર્યું હતું. વ્યાપક જાહેર હિત માટે સાથે મળીને કામ કરવામાં રાજકીય મતભેદો આડે આવવા જોઈએ નહીં, એમ તેમણે જણાવ્યું હતું.

ઉપરાષ્ટ્રપતિએ કહ્યું હતું કે ભારતની તાકાત વિવિધતામાં એકતામાં છે. બંધારણ સંઘની તાકાતને રાજ્યોની જવાબદારીઓ અને વાજબી સ્વાયત્તતા સાથે સંતુલિત કરવાનું માળખું પૂરું પાડે છે. ભારતીય સંઘવાદની સાચી તાકાત વિવિધતાનો આદર કરીને સમાન રાષ્ટ્રીય ઉદ્દેશ્યો તરફ કામ કરવામાં છે.

વિકસિત ભારત @૨૦૪૭ માટે મજબૂત કાયદાઓ, પારદર્શક સંસ્થાઓ, કાર્યક્ષમ વહીવટ અને સૌ માટે ન્યાય જરૂરી હોવાનું તેમણે જણાવ્યું હતું. તેમણે છેલ્લા ૧૨ વર્ષમાં ગુલામીના યુગના ૩ ગુનાહિત કાયદાઓ બદલવા અને ૧,૭૦૦થી વધુ જૂના અપ્રસ્તુત કાયદાઓ રદ કરવાને કાયદાકીય માળખાના આધુનિકીકરણ તરફનું મોટું પગલું ગણાવ્યું હતું. જીવનની સરળતા અને કાર્યક્ષમ સુશાસન માટે જૂના કાયદાઓ ઓળખી તેમાં સુધારા કરવા અથવા તેમને રદ કરવાની ભલામણ કરવા તેમણે રાજ્યના વિધિ પંચોને આગ્રહ કર્યો હતો.

કાયદાકીય સુધારામાં સહકારી સંઘવાદનો અર્થ દરેક બાબતમાં એકરૂપતા નથી, એમ જણાવી તેમણે કહ્યું હતું કે બંધારણીય જવાબદારીઓ જ્યાં એકરૂપ થાય ત્યાં કેન્દ્ર અને રાજ્યોએ સાથે કામ કરવું જોઈએ અને રાજ્યોની વિશિષ્ટ જરૂરિયાતો માટે યોગ્ય જગ્યા જાળવવી જોઈએ. ભારતના વિધિ પંચ, રાજ્ય વિધિ પંચો અને રાજ્યના કાયદા વિભાગો વચ્ચે આંતર-રાજ્ય પરામર્શ, ઉત્કૃષ્ટ પદ્ધતિઓના આદાનપ્રદાન અને જૂના કાયદાઓની પદ્ધતિસરની સમીક્ષા દ્વારા મજબૂત સંકલનનું તેમણે આહ્વાન કર્યું હતું.

સંસદમાં સ્થાપિત સેંગોલનો ઉલ્લેખ કરતાં ઉપરાષ્ટ્રપતિએ સુશાસન અને કાયદાના શાસન અંગે તમિલ સંત-કવિ તિરુવલ્લુવરના જ્ઞાનને યાદ કર્યું હતું. સત્તાના ઉપયોગ કરતાં સુશાસન કાયમી સફળતા અને સમૃદ્ધિનો પાયો છે, એમ તેમણે ભારપૂર્વક જણાવ્યું હતું. પરિષદ સુસંગત, પ્રતિભાવશીલ અને નાગરિક-કેન્દ્રી કાયદાકીય માળખા માટે નક્કર અને અમલયોગ્ય ભલામણો રજૂ કરશે તેવી આશા પણ તેમણે વ્યક્ત કરી હતી.

આ પ્રસંગે કેન્દ્રીય કાયદા અને ન્યાય રાજ્ય મંત્રી (સ્વતંત્ર પ્રભારી) શ્રી અર્જુન રામ મેઘવાલ, ભારતના વિધિ પંચના અધ્યક્ષ જસ્ટિસ દિનેશ માહેશ્વરી, સભ્ય સચિવ ડૉ. અંજુ રાઠી રાણા અને સભ્ય પ્રો. ડી. પી. વર્મા સહિતના મહાનુભાવો ઉપસ્થિત રહ્યા હતા.