પ્રધાનમંત્રી ૨૩ ઓક્ટોબરે ચિન્મય અમૃત મહોત્સવ વૈશ્વિક સંમેલનનું ઉદ્ઘાટન કરશે

પ્રધાનમંત્રી શ્રી નરેન્દ્ર મોદી ૨૩ ઓક્ટોબર ૨૦૨૬ના રોજ સવારે ૧૧ વાગ્યે ભારત મંડપમ, નવી દિલ્હી ખાતે ચિન્મય અમૃત મહોત્સવ વૈશ્વિક સંમેલનનું ઉદ્ઘાટન કરશે. તેઓ આ પ્રસંગે ઉપસ્થિત જનમેદનીને સંબોધિત પણ કરશે.

૨૩થી ૨૫ ઓક્ટોબર ૨૦૨૬ દરમિયાન યોજાનારા આ ત્રિદિવસીય સંમેલનમાં ભારત અને વિદેશમાંથી ૯,૦૦૦થી વધુ સહભાગીઓ એકત્ર થશે. આ કાર્યક્રમ ચિન્મય મિશનનાં ૭૫ વર્ષ પૂર્ણ થવાની ઉજવણી નિમિત્તે વર્ષભર ચાલેલા ઉત્સવોની પૂર્ણાહુતિ દર્શાવે છે. વેદાંત અને ભગવદ્ ગીતાનું જ્ઞાન સૌ સુધી પહોંચાડવા સ્વામી ચિન્મયાનંદે ૧૯૫૧માં ચિન્મય મિશન નામના વૈશ્વિક આધ્યાત્મિક આંદોલનની સ્થાપના કરી હતી. દાયકાઓ દરમિયાન મિશને આધ્યાત્મિક શિક્ષણ, સાંસ્કૃતિક જાળવણી, યુવા સશક્તિકરણ અને સમુદાય સેવામાં પોતાનું કાર્ય વિસ્તાર્યું છે.

વર્ષભરની ઉજવણીની શરૂઆત ગયા વર્ષે તમિલનાડુના ગંગાઈકોંડા ચોલાપુરમ ખાતે થઈ હતી. ત્યાં પ્રધાનમંત્રીએ ઇલૈયારાજાના સંગીત સાથે ચિન્મય મિશન દ્વારા તૈયાર કરાયેલ ભગવદ્ ગીતાના તમિલ કાવ્યાનુવાદનું વિમોચન કર્યું હતું. આ વર્ષ દરમિયાન અનેક પહેલો અને કાર્યક્રમો યોજાયાં હતાં. તેમાં વિવિધ સ્થળોએ સમૂહ હવન, ત્રિપુરામાં મા સૌંદર્ય ચિન્મયી મંદિરની પ્રાણપ્રતિષ્ઠા અને ‘ચિન્મય ગીતા સમર્પણમ’નો સમાવેશ થાય છે. આ પહેલ હેઠળ વિશ્વભરના ૧ લાખથી વધુ લોકોએ ઓનલાઈન એકસાથે ભગવદ્ ગીતાના ૧૫મા અધ્યાયનો પાઠ કર્યો હતો.

ઉજવણીની મુખ્ય પહેલોમાંની એક ‘ગીતા પંચામૃત’ હતી, જે ભગવદ્ ગીતાના પાંચ પસંદગીના શ્લોકો પર કેન્દ્રિત હતી. ગીતાનો સંદેશ સમગ્ર દેશમાં પહોંચાડવા ચિન્મય યુવા કેન્દ્રના ૧૫ યુવા સભ્યોએ ‘ચિન્મય અમૃત યાત્રા’ હાથ ધરી હતી. આ યાત્રા દરમિયાન તેમણે સમગ્ર દેશમાં ૪૦,૦૦૦ કિલોમીટરથી વધુ પ્રવાસ કર્યો હતો.