વિશ્વ એઆઈ અને જીન-આધારિત સચોટ ચિકિત્સા યુગમાં, ભારત અગ્રેસર: ડૉ. જિતેન્દ્ર સિંહ

નવી દિલ્હી :: વિશ્વ આર્ટિફિશિયલ ઇન્ટેલિજન્સ (એઆઈ) નિર્દેશિત અને જીન-આધારિત સચોટ ચિકિત્સાના યુગમાં પ્રવેશી રહ્યું છે અને ભારત અદ્યતન આરોગ્ય સંભાળ સમાધાનોના અગ્રણી પ્રદાતાઓમાં ઊભરી રહ્યું છે, તેમ કેન્દ્રીય મંત્રી ડૉ. જિતેન્દ્ર સિંહે જણાવ્યું છે. ચેન્નઈ સ્થિત શ્રી રામચંદ્ર ઉચ્ચ શિક્ષણ અને સંશોધન સંસ્થા (એસઆરઆઈએચઈઆર)ના ૪૨મા દીક્ષાંત સમારોહને મુખ્ય અતિથિ તરીકે સંબોધતા તેમણે આ વાત કહી હતી.

મેડિસિન અને ડાયાબિટીસના પ્રોફેસર રહી ચૂકેલા ડૉ. જિતેન્દ્ર સિંહે જણાવ્યું કે ચિકિત્સાનું ભવિષ્ય તકનીકી પ્રગતિ અને સચોટ નૈદાનિક નિર્ણયના સમન્વય પર તેમજ યુવાનોમાં જીવનશૈલી સંબંધિત રોગો અટકાવવા પર નિર્ભર રહેશે. કુલાધિપતિ વી. આર. વેંકટાચલમ અને પ્રો-ચાન્સલર આર. વી. સિંહ રુતવારની ઉપસ્થિતિમાં તેમણે પદવીધારકો તથા સુવર્ણ ચંદ્રક વિજેતાઓને અભિનંદન પાઠવ્યા હતા અને અસ્વસ્થતાના કારણે ગેરહાજર રહેલાં કુલપતિ ડૉ. ઉમાના ઝડપી સ્વાસ્થ્ય સુધારાની કામના કરી હતી.

ચાર દાયકાના તબીબી અનુભવને ટાંકીને મંત્રીએ જણાવ્યું કે અગાઉ ચેપી રોગો પર ધ્યાન અપાતું હતું, પરંતુ હવે મધુપ્રમેહ અને હૃદય રોગ જેવી જીવનશૈલી સંબંધિત બીમારીઓનો બોજ વધ્યો છે. ૩૦ વર્ષની વયે ડાયાબિટીસ થવાથી દાયકાઓ સુધી દુષ્પરિણામો ભોગવવા પડે છે, જેથી યુવાનોમાં આવા રોગોની રોકથામ 'વિકસિત ભારત ૨૦૪૭'ના લક્ષ્ય માટે અત્યંત જરૂરી છે.

તેમણે ઉમેર્યું કે ભારતે કોવિડ-૧૯ સામે સ્વદેશી ડીએનએ રસી, ડેન્ગ્યુ અને મેલેરિયા રસી સંશોધન, હિમોફિલિયા માટે જીન થેરાપી અને ન્યુમોનિયા માટે નેફિથ્રોમાયસિન તેમજ પરમાણુ ચિકિત્સામાં નોંધપાત્ર પ્રગતિ કરી છે. તેમણે જીનોમિક્સ, બાયોમેન્યુફેક્ચરિંગ અને પરમાણુ ચિકિત્સા ક્ષેત્રે રાષ્ટ્રીય સંશોધનો સાથે ભાગીદારી કરવા એસઆરઆઈએચઈઆરને આમંત્રણ આપ્યું હતું.