અમિત શાહે યમુના શુદ્ધીકરણના ₹૮,૯૪૧ કરોડના પ્રોજેક્ટ્સ શરૂ કર્યા

કેન્દ્રીય ગૃહ અને સહકારિતા મંત્રી અમિત શાહે દિલ્હીમાં યમુનાના પુનરુદ્ધાર સાથે સંકળાયેલા ₹૮,૯૪૧ કરોડના પ્રોજેક્ટ્સના લોકાર્પણ અને શિલાન્યાસ સમારોહમાં હાજરી આપી હતી. આ પ્રસંગે દિલ્હીના ઉપરાજ્યપાલ તરનજિત સિંહ સંધૂ અને મુખ્યમંત્રી રેખા ગુપ્તા સહિતના મહાનુભાવો ઉપસ્થિત રહ્યા હતા.

શાહે જણાવ્યું કે પ્રધાનમંત્રી નરેન્દ્ર મોદીએ દિલ્હી સરકાર અને ગૃહ મંત્રાલય સમક્ષ યમુનાને શુદ્ધ કરવાનું વિઝન મૂક્યું હતું. આ યોજના હેઠળ અત્યાર સુધીમાં ૪૦ ટકાથી વધુ સફળતા મળી છે. તેમણે કહ્યું કે કેન્દ્ર તથા દિલ્હી, હરિયાણા અને ઉત્તર પ્રદેશની સરકારોએ ત્રણેય રાજ્યો માટે સમયબદ્ધ રોડમેપ તૈયાર કર્યો છે અને ૨૦૨૯ સુધીમાં યમુનાને સ્વચ્છ કરવાનું લક્ષ્ય રાખ્યું છે. તેમણે મે ૨૦૨૯ પહેલાં યમુનાને શુદ્ધ કરવાનો વિશ્વાસ પણ વ્યક્ત કર્યો.

સમારોહમાં ૧૦ પ્રોજેક્ટ્સનું ઉદ્ઘાટન અને ૩૩ પ્રોજેક્ટ્સનો પ્રારંભ કરાયો હતો. કુલ ₹૮,૯૪૧ કરોડના ખર્ચે શરૂ થયેલી યોજનાઓથી લાખો લીટર પાણી શુદ્ધ થઈને યમુનામાં વહેશે, એમ શાહે જણાવ્યું. હાલના એસટીપીના અપગ્રેડેશન અને નવા એસટીપીની સ્થાપના માટે શિલાન્યાસ થયો છે. વિકેન્દ્રિત એસટીપી પમ્પિંગ સ્ટેશન સ્થાપિત કરાયું છે અને ઘરોને ગટર લાઈનો સાથે જોડવાનું કામ શરૂ થયું છે. સીવર રિહેબિલિટેશન, ટેપિંગ તથા ગટરના કામો પણ આગળ ધપાવાઈ રહ્યાં છે.

શાહે જણાવ્યું કે છેલ્લા ૩૦ વર્ષથી અગાઉની સરકારો દિલ્હીના ગંદા પાણીને યમુનામાં છોડવાની મંજૂરી આપતી હતી અને ડેરીઓમાંથી દરરોજ ૨,૦૦૦ ટન છાણ નદીમાં નાખવામાં આવતું હતું. તેમણે કહ્યું કે દિલ્હી, હરિયાણા અને ઉત્તર પ્રદેશ માટે તૈયાર કરાયેલા સંયુક્ત રોડમેપથી યમુનાને સ્વચ્છ કરવામાં આવશે.

દિલ્હીના કચરા અંગે શાહે કહ્યું કે રેખા ગુપ્તા સરકારે કેન્દ્ર સરકારની મદદથી ૨.૧૭ કરોડ મેટ્રિક ટન કચરો સાફ કર્યો છે અને ૧૦૦ એકર જમીન કચરામુક્ત કરી છે. ઓખલા અને ભલસ્વા ખાતે કચરાના પહાડો ૩૦થી ૪૦ મીટર ઘટ્યા છે, જ્યારે ગાઝીપુર ખાતેનો પહાડ ૧૦થી ૧૫ મીટર નીચે આવ્યો છે. બે વર્ષમાં કચરાના પહાડોની જગ્યાએ બગીચા બનાવાશે, એમ તેમણે જણાવ્યું. દિલ્હીના દરેક ઘરને સીવરેજ જોડાણ આપવા માટે ત્રણ વર્ષનો એક્શન પ્લાન તૈયાર કરાયો હોવાનું પણ તેમણે કહ્યું.