ભારતીય ટપાલે રચ્યો ઇતિહાસ: સતત બે ક્વાર્ટરમાં ૪,૦૦૦ કરોડથી વધુની આવક

નવી દિલ્હી :: ટપાલ વિભાગે સતત બે ત્રિમાસિક ગાળામાં ૪,૦૦૦ કરોડ રૂપિયાથી વધુની ત્રિમાસિક આવક મેળવીને એક ઐતિહાસિક સિદ્ધિ હાંસલ કરી છે. વિભાગે નાણાકીય વર્ષ ૨૦૨૬-૨૭ (એપ્રિલ-સપ્ટેમ્બર ૨૦૨૬)ના પ્રથમ છમાસિક ગાળામાં ૮,૨૧૨.૭ કરોડ રૂપિયાની આવક નોંધાવી છે, જે પાછલા નાણાકીય વર્ષના સમાન ગાળામાં મેળવેલ ૬,૬૩૬ કરોડ રૂપિયાની સરખામણીએ ૨૪ ટકાનો વાર્ષિક વધારો દર્શાવે છે.

કેન્દ્રીય સંચાર અને ઉત્તર પૂર્વીય ક્ષેત્ર વિકાસ મંત્રી જ્યોતિરાદિત્ય એમ. સિંધિયાની અધ્યક્ષતામાં નવી દિલ્હી ખાતે બીજી ત્રિમાસિક સમીક્ષા બેઠક યોજાઈ હતી. આ બેઠકમાં કેન્દ્રીય સંચાર અને ગ્રામીણ વિકાસ રાજ્ય મંત્રી ડૉ. ચંદ્રશેખર પેમ્માસાની, ટપાલ સચિવ સુબ્રત દાસ, ટપાલ સેવા મહાનિદેશક મનીષા સિંહા તેમજ વિવિધ સર્કલોના વરિષ્ઠ અધિકારીઓ ઉપસ્થિત રહ્યા હતા. ટપાલ વિભાગે નાણાકીય વર્ષ ૨૦૨૬-૨૭ના બીજા ક્વાર્ટરમાં (જુલાઈ-સપ્ટેમ્બર ૨૦૨૬) ૪,૨૦૧.૫ કરોડ રૂપિયાની આવક મેળવી છે, જે ગત વર્ષની સમાન ત્રિમાસિક કરતાં ૨૫ ટકા અને પ્રથમ ક્વાર્ટર કરતાં ૫ ટકા વધુ છે.

વિભાગના તમામ વ્યવસાયિક ક્ષેત્રોમાં વૃદ્ધિ નોંધાઈ છે. પાર્સલ કારોબારમાં ૭૧ ટકાનો જબરદસ્ત ઉછાળો નોંધાયો હતો અને તેણે બીજા ક્વાર્ટરમાં ૩૧૮.૯ કરોડ રૂપિયાની આવક મેળવી છે. આ ઉપરાંત PLI/RPLI માં ૪૪ ટકા, ટપાલ સામગ્રીમાં ૩૬ ટકા, IR અને GB માં ૩૮ ટકા તેમજ પોસ્ટ ઓફિસ બચત બેંક (POSB) માં ૧૮ ટકા વૃદ્ધિ જોવા મળી હતી, જેમાં POSB નો ફાળો ૧,૯૮૭ કરોડ રૂપિયા રહ્યો હતો.

કામગીરીની દ્રષ્ટિએ બિહાર ટપાલ સર્કલ ૯૭.૧૫ ટકા લક્ષ્ય સિદ્ધિ સાથે ટોચ પર રહ્યું હતું, જ્યારે પશ્ચિમ બંગાળ ૯૭.૦૭ ટકા અને ઉત્તર પૂર્વ સર્કલ ૯૪.૭૯ ટકા સાથે ક્રમશઃ બીજા અને ત્રીજા સ્થાને રહ્યા હતા. શ્રેષ્ઠ કામગીરી બદલ પ્રથમ ક્વાર્ટર માટે આંધ્રપ્રદેશ અને બીજા ક્વાર્ટર માટે બિહાર સર્કલનું સન્માન કરવામાં આવ્યું હતું. કુલ ૨૩ સર્કલોમાંથી ૧૮ સર્કલોએ પોતાની કામગીરીમાં સુધારો નોંધાવ્યો છે.

કેન્દ્રીય મંત્રી જ્યોતિરાદિત્ય સિંધિયાએ ગ્રાહક-કેન્દ્રિત અભિગમ, વ્યાપારિક વિવિધતા, નવીનતા અને ડિજિટાઈઝેશન પર ભાર મૂકતાં જણાવ્યું હતું કે સેવાની ગુણવત્તા વધારીને આ વૃદ્ધિ જાળવી રાખવી જરૂરી છે. રાજ્ય મંત્રી ડૉ. ચંદ્રશેખર પેમ્માસાનીએ પાર્સલ વિતરણમાં વિલંબ અટકાવવા વાસ્તવિક સમયના મોનિટરિંગ અને પ્રક્રિયાઓના માનકીકરણ પર ભાર મૂક્યો હતો.