શિવરાજ સિંહ ચૌહાણે રાષ્ટ્રવ્યાપી 'ખેત બચાવો અભિયાન'નો પ્રારંભ કરાવ્યો

નવી દિલ્હી: કેન્દ્રીય કૃષિ અને ખેડૂત કલ્યાણ તથા ગ્રામીણ વિકાસ મંત્રી શ્રી શિવરાજ સિંહ ચૌહાણે હરિયાણાના કર્નાલ જિલ્લાના ઐતિહાસિક નગર તરાવડી ખાતેથી રાષ્ટ્રવ્યાપી 'ખેત બચાવો અભિયાન'નો ઔપચારિક પ્રારંભ કરાવ્યો છે. દેશભરના કૃષિ વિજ્ઞાન કેન્દ્રો અને સંસ્થાઓ સાથે વર્ચ્યુઅલી જોડાયેલા લાખો ખેડૂતો અને કૃષિ વૈજ્ઞાનિકોને સંબોધતા તેમણે ચેતવણી આપી હતી કે જો રાસાયણિક ખાતરો અને જંતુનાશકોનો અસંતુલિત ઉપયોગ નહીં અટકે તો ધરતી પાક પેદા કરવાની ના પાડી દેશે અને માનવ શરીર રોગોનું ઘર બની જશે. તેમણે ૨૨ ઓક્ટોબરથી ૩૦ નવેમ્બર દરમિયાન દેશના દરેક ગામમાં વ્યાપક જનજાગરણ અભિયાન ચલાવવાનું આહ્વાન કર્યું હતું.

આ પ્રસંગે કેન્દ્રીય ગ્રામીણ વિકાસ મંત્રી તરીકે તેમણે હરિયાણાને મોટી ભેટ આપતા પ્રધાનમંત્રી આવાસ યોજના (ગ્રામીણ) હેઠળ ૨૮,૪૨૨ પાકા મકાનોના નિર્માણ માટે ₹૧,૩૪૩.૦૬ કરોડની નાણાકીય મંજૂરીનો પત્ર હરિયાણાના કૃષિ મંત્રી શ્રી શ્યામ સિંહ રાણાને સોંપ્યો હતો.

કેન્દ્રીય મંત્રીએ જણાવ્યું હતું કે આંતરરાષ્ટ્રીય બજારમાં ખાતરના ભાવ વધવા છતાં પ્રધાનમંત્રી શ્રી નરેન્દ્ર મોદીના નેતૃત્વમાં સરકાર ₹દોઢ લાખ કરોડથી વધુની સબસિડી ભોગવી રહી છે, જેથી ખેડૂતોને યુરિયાની થેલી માત્ર ₹૨૬૬ અને ડીએપી ₹૧૩૫૦માં મળે છે. જોકે સસ્તું ખાતર મળવાનો અર્થ એ નથી કે ખેતરોમાં આડેધડ ઉપયોગ કરવો. જમીનમાં જરૂર વગર ખાતર નાખવું એ જમીનમાં ઝેર ભેળવવા સમાન છે. ભારત હવે ગ્રીન એમોનિયાના ઉપયોગ તરફ આગળ વધી રહ્યું છે અને ભવિષ્યમાં ખાતર ઉત્પાદનમાં આત્મનિર્ભર બનશે.

શ્રી ચૌહાણે જમીનના રક્ષણ માટે ત્રણ મહત્વના ઉપાયો રજૂ કર્યા હતા: પ્રથમ, ખેડૂતો સોઇલ હેલ્થ કાર્ડ જોઈને જ જરૂરિયાત મુજબ સંતુલિત ખાતર નાખે. બીજું, પાક ચક્રમાં ફેરફાર કરીને ડાંગર-ઘઉં વચ્ચે ચણા, મસૂર કે તુવેર જેવા કઠોળ વાવે, જે કુદરતી રીતે નાઇટ્રોજન વધારે છે. ત્રીજું, ખેડૂતો ઓછામાં ઓછા અડધા એકરમાં બીજામૃત અને ઘનજીવામૃત બનાવીને પ્રાકૃતિક ખેતી શરૂ કરે. તેમણે પરાળી બાળવા સામે ચેતવણી આપતા કહ્યું કે પરાળી બાળવાથી અળસિયાં અને ઉપયોગી સૂક્ષ્મ જીવાણુઓ નાશ પામે છે.

આ કાર્યક્રમમાં આઈસીએઆરના મહાનિદેશક તેમજ ડેયરના સચિવ ડૉ. માંગીલાલ જાટ, હરિયાણાના અધિક મુખ્ય સચિવ (કૃષિ) વિજેન્દ્ર કુમાર સહિતના વૈજ્ઞાનિકો અને ખેડૂતો ઉપસ્થિત રહ્યા હતા. મંચ પરથી 'ખેત બચાવો અભિયાન' પુસ્તિકાનું વિમોચન પણ કરવામાં આવ્યું હતું.