રાજ્યપાલે ભરૂચના ખેડૂતોને પ્રાકૃતિક ખેતી અપનાવવા માર્ગદર્શન આપ્યું

ભરૂચ જિલ્લાના જૂના બોરભાઠા ગામે આયોજિત પ્રાકૃતિક કૃષિ પરિસંવાદમાં રાજ્યપાલ શ્રી આચાર્ય દેવવ્રતજીએ ખેડૂતોને પ્રાકૃતિક ખેતી અંગે માર્ગદર્શન આપ્યું હતું. ભરૂચ જિલ્લા વહીવટી તંત્રના આ કાર્યક્રમમાં પ્રાકૃતિક કૃષિ ઉત્પાદનોના વેચાણ માટે સ્ટોલ ઊભા કરાયા હતા. રાજ્યપાલે સ્ટોલની મુલાકાત લઈ ખેડૂતો સાથે સંવાદ કર્યો હતો. સફળ પ્રાકૃતિક ખેતીથી અન્યોને પ્રેરણા આપનારા ખેડૂતોનું સન્માન કરાયું હતું, જ્યારે પ્રગતિશીલ ખેડૂતોએ પોતાના અનુભવો રજૂ કર્યા હતા.

રાજ્યપાલે જણાવ્યું હતું કે રાસાયણિક ખેતીના વ્યાપને કારણે જીવલેણ રોગો વધી રહ્યા છે અને રાસાયણિક ખાતરો તથા ઝેરી જંતુનાશકોના બેફામ ઉપયોગથી ધરતી બંજર બની છે. ઓછા ખર્ચે વધુ ઉત્પાદન અને સ્વસ્થ સમાજ માટે પ્રાકૃતિક કૃષિ સમયની માંગ હોવાનું તેમણે કહ્યું હતું. તેમણે એક સંશોધનનો ઉલ્લેખ કરતાં જણાવ્યું કે ૧૦૫ માતાઓના દૂધના પરીક્ષણમાં તમામના દૂધમાં યૂરિયા અને જંતુનાશકોના અંશ જોવા મળ્યા હતા. તેમના જણાવ્યા મુજબ, ખેતરોમાં વપરાતા રાસાયણિક ખાતરોનું ઝેર અનાજ અને ફળો દ્વારા માનવ શરીરમાં પ્રવેશે છે અને ૧૦ વર્ષના બાળકો પણ કેન્સર તથા ડાયાબિટીસ જેવી બીમારીઓનો ભોગ બની રહ્યા છે.

ઉત્પાદન ઘટવાની માન્યતાને ખોટી ગણાવતાં રાજ્યપાલે કહ્યું હતું કે ગુજરાતમાં ૮ લાખથી વધુ ખેડૂતો પ્રાકૃતિક ખેતી તરફ વળ્યા છે અને ઉત્પાદન ઘટવાનો ડર અફવા છે. કુરુક્ષેત્રના ગુરુકુલમાં ૧૮૦ એકર જમીનમાં એક ટીપું પણ યૂરિયા કે ડીએપી વાપર્યા વિના પ્રાકૃતિક ખેતી થતી હોવાનું તેમણે જણાવ્યું હતું. ભરૂચ જિલ્લામાં ૨૨ હજાર કરતાં વધુ ખેડૂતો આ ખેતી અપનાવી રહ્યા છે તે બદલ તેમણે આનંદ વ્યક્ત કર્યો હતો.

રાજ્યપાલે ખેડૂતોને પોતાના ગામના અન્ય ખેડૂતોને પણ અભિયાનમાં જોડવા અને દેશી ગાય આધારિત પ્રાકૃતિક ખેતી અપનાવવા આહવાન કર્યું હતું. તેમના જણાવ્યા મુજબ, આવી ખેતીથી ધરતીનું જળસ્તર સુધારવા, પશુ-પક્ષીઓને બચાવવા અને આવનારી પેઢીને સ્વસ્થ જીવન આપવા મદદ મળશે. તેમણે વડાપ્રધાન શ્રી નરેન્દ્રભાઈ મોદીએ દેશભરમાં શરૂ કરેલા પ્રાકૃતિક કૃષિ અભિયાન સાથે મળીને કામ કરી ભારતને ઝેરમુક્ત, સ્વસ્થ અને સમૃદ્ધ બનાવવા અપીલ કરી હતી.

રાજ્યના પાણી પુરવઠા રાજ્યમંત્રીશ્રી ઈશ્વરસિંહ પટેલે રાસાયણિક ખાતરો અને જંતુનાશકોના અતિશય ઉપયોગથી કેન્સર, હૃદયરોગ અને કિડનીની ગંભીર બીમારીઓનું જોખમ વધતું હોવાનું જણાવ્યું હતું. તેમણે કહ્યું કે આ સમસ્યાના નિવારણ માટે રાજ્યપાલે પ્રાકૃતિક ખેતીનો મહાયજ્ઞ શરૂ કર્યો છે. વડાપ્રધાનશ્રી નરેન્દ્રભાઈ મોદીના માર્ગદર્શન અને મુખ્યમંત્રીશ્રી ભૂપેન્દ્રભાઈ પટેલના નેતૃત્વમાં રાજ્ય સરકાર ખેડૂતોના કલ્યાણ માટે કટિબદ્ધ હોવાનું પણ તેમણે જણાવ્યું હતું.

જિલ્લા કલેક્ટરશ્રી ડૉ. નવનાથ ગવ્હાણેએ જણાવ્યું હતું કે જિલ્લામાં પ્રાકૃતિક ખેતી માટે ૧૮૦ ક્લસ્ટર તૈયાર કરાયા છે અને ૩૬૦ કૃષિ સખી/કિસાન મિત્રોની નિમણૂક કરાઈ છે. હાલ ૨૨,૫૦૦ ખેડૂતો પ્રાકૃતિક ખેતી માટે સજ્જ થયા છે. ગત વર્ષે ૫૫ બાયો રિસોર્સ સેન્ટર અને ૩૨૩ મોડેલ ફાર્મ તૈયાર કરાયા હતા; ચાલુ વર્ષે વધુ ૧૩ સેન્ટર અને ૭૩ નવા મોડેલ ફાર્મ બનાવવાનું આયોજન છે. અત્યાર સુધીમાં ૧ લાખથી વધુ ખેડૂતોને માર્ગદર્શન અપાયું છે અને ૨૩,૬૫૩ હેક્ટર જમીન પ્રાકૃતિક ખેતી હેઠળ આવરી લેવાઈ છે.

આ પ્રસંગે રાજ્યપાલે કૃષિ સખી અને કિસાન મિત્ર-CRP સાથે સંવાદ કરી પ્રાકૃતિક ખેતીનો વ્યાપ વધારવા પ્રોત્સાહિત કર્યા હતા. કાર્યક્રમમાં ધારાસભ્યશ્રી રેમશભાઈ મિસ્ત્રી, શ્રી રિતેશભાઈ વસાવા, અંકલેશ્વર તાલુકા પંચાયત પ્રમુખ શ્રી વિવેકભાઈ ફરિદીવાલા, જિલ્લા વિકાસ અધિકારીશ્રી યોગેશ કાપસે સહિત અગ્રણીઓ, અધિકારીઓ, ખેડૂતો અને નાગરિકો જોડાયા હતા.