રાજ્યમાં વીજળીની વધતી માંગ સામે અવિરત પુરવઠો જાળવવા સરકારનું સર્વગ્રાહી આયોજન

રાજ્યમાં ઊર્જા ક્ષેત્રે સતત વધી રહેલી વીજ માંગ અને પુરવઠાની પરિસ્થિતિની સર્વગ્રાહી સમીક્ષા કરવા માટે મુખ્યમંત્રી શ્રી ભૂપેન્દ્ર પટેલના નિવાસસ્થાને ઉચ્ચસ્તરીય બેઠક યોજાઈ હતી. આ બેઠકમાં ઊર્જા મંત્રીશ્રી ઋષિકેશ પટેલ, રાજ્ય મંત્રી શ્રી કૌશિકભાઈ વેકરીયા અને મુખ્ય સચિવ શ્રી મનોજકુમાર દાસ સહિતના ઉચ્ચ અધિકારીઓ ઉપસ્થિત રહ્યા હતા. ખેડૂતો, ઉદ્યોગો અને સામાન્ય નાગરિકોને અવિરત વીજ પુરવઠો મળી રહે તે માટે સરકારે લીધેલાં તાત્કાલિક પગલાં અને ભવિષ્યના આયોજન અંગે બેઠકમાં વિસ્તૃત ચર્ચા હાથ ધરાઈ હતી.

બેઠકમાં રજૂ કરાયેલી વિગતો અનુસાર, ગત તા. ૧૬.૧૦.૨૦૨૬ ના રોજ રાજ્યમાં અત્યાર સુધીની સર્વોચ્ચ ૨૯,૮૨૨ મેગાવોટ વીજ માંગ નોંધાઈ હતી, જે ગત વર્ષના ઓક્ટોબર મહિનાની ૨૧,૮૨૨ મેગાવોટની સરખામણીએ ૩૬.૬% વધુ છે. આ જ દિવસે દૈનિક વીજ વપરાશ ૫૭૪ મિલિયન યુનિટ રહ્યો હતો, જે ગત વર્ષના ઓક્ટોબરના ૪૫૭ મિલિયન યુનિટ કરતાં ૨૭% વધારે છે. રાજ્યમાં કુલ વીજ વપરાશ પૈકી PGVCL માં ૩૦%, DGVCL માં ૨૨%, UGVCL માં ૨૨%, MGVCL માં ૧૦% અને અન્ય ડિસ્કોમમાં ૧૬% વપરાશ નોંધાયો છે. નબળા ચોમાસા, ઊંચા તાપમાન અને કૃષિ તેમજ તહેવારોની ઔદ્યોગિક માંગના કારણે સપ્ટેમ્બર અને ઓક્ટોબરમાં વીજ માંગ આશરે ૧૨% (૪,૦૦૦ મેગાવોટ) વધી છે. કૃષિ લોડ પણ વધીને દૈનિક મહત્તમ ૧૨,૦૦૦ મેગાવોટ રહ્યો છે.

સાંજે ૫ થી રાત્રે ૧૧ વાગ્યા દરમિયાન સોલાર ઉત્પાદન શૂન્ય રહેતાં કોલસા અને ગેસ આધારિત પ્લાન્ટ્સમાંથી પુરવઠો જાળવવામાં આવી રહ્યો છે. કોલસા પુરવઠા માટે કેન્દ્રીય મંત્રાલયે નવેમ્બર સુધી રોજના ૧૦ થી ૧૧ રેક અને ત્યારબાદ ૧૩ થી ૧૪ રેક આપવાની ખાતરી આપી છે. આ ઉપરાંત કેન્દ્ર સરકાર પાસેથી NTPC ના ફરક્કા પ્લાન્ટમાંથી ૩૨૯ મેગાવોટ, આસામના ફાળામાંથી ૫૫૧ મેગાવોટ ઉપલબ્ધ કરાયા છે તેમજ બાઢ-I અને દાદરી-I ના ૭૧૬ મેગાવોટના કરાર માર્ચ ૨૦૨૮ સુધી લંબાવાયા છે.

ભવિષ્યના આયોજન અંગે ઊર્જા અગ્ર સચિવશ્રીએ જણાવ્યું કે, પીક અવર્સ માટે બેટરી એનર્જી સ્ટોરેજ સિસ્ટમ (BESS) હેઠળ હાલ ૧૯૨ મેગાવોટ કાર્યરત છે અને ૨,૭૪૨ મેગાવોટના કરારો પૂર્ણ થયા છે. ૨૦૨૮-૨૯ થી સેન્ટ્રલ થર્મલમાંથી ૧૩૦૦+ મેગાવોટ અને હાઇડ્રોમાંથી ૧૨૦૦+ મેગાવોટ મળશે. SHAKTI સ્કીમ હેઠળ ૪,૦૦૦ મેગાવોટના ટેન્ડર ટૂંક સમયમાં થશે તથા NPCIL સાથે ૪,૨૦૦ મેગાવોટના ન્યુક્લીઅર પ્રોજેક્ટ માટે MoU કરાયા છે. ઉકાઈ ખાતે ૮૦૦ મેગાવોટનો થર્મલ પ્લાન્ટ નિર્માણાધીન છે અને સિનોર, વણાકબોરી તથા ગાંધીનગરમાં નવા પ્રોજેક્ટ્સની પ્રક્રિયા ચાલી રહી છે. મુખ્યમંત્રીશ્રીએ આ કામગીરીને વધુ ગતિ આપવા નિર્દેશ આપ્યા હતા.