સાયરામાં ૯૭ વિદ્યાર્થિનીઓને સુરક્ષા અને કિશોરાવસ્થા અંગે માર્ગદર્શન

જિલ્લા મહિલા અને બાળ અધિકારીની કચેરી, કચ્છ દ્વારા નખત્રાણા તાલુકાના સાયરા ખાતે ‘બેટી બચાઓ, બેટી પઢાઓ’ સેલ અંતર્ગત જાગૃતિ કાર્યક્રમ યોજાયો હતો. તેમાં શાળાની ૯૭ વિદ્યાર્થિનીઓને સેફ ટચ–અનસેફ ટચ, માસિક ધર્મ દરમિયાન સ્વચ્છતા અને કિશોરાવસ્થામાં થતા ફેરફારો અંગે માહિતગાર કરવામાં આવી હતી.

કાર્યક્રમમાં શાળાના આચાર્ય નવીનભાઈ ધોરીયા, DHEWનાં જેન્ડર સ્પેશિયાલિસ્ટ દીપ્તીબેન ઠક્કર, SFL ક્રિષ્નાબેન ભુડિયા તથા સખી વન સ્ટોપ સેન્ટર (OSC)નાં પેરા લીગલ અર્ચનાબેન ભગોરા ઉપસ્થિત રહ્યાં હતાં. તેમણે વિદ્યાર્થિનીઓને માર્ગદર્શન આપ્યું હતું.

SFLનાં ક્રિષ્નાબેન ભુડિયાએ સેફ ટચ–અનસેફ ટચ અંગે સમજ આપીને બાળકોને પોતાના શરીર પ્રત્યે જાગૃત રહેવા અને પોતાની સુરક્ષાને પ્રાથમિકતા આપવા જણાવ્યું હતું. માસિક દરમિયાન શારીરિક સ્વચ્છતા જાળવવા, સંકોચ વિના સાચી માહિતી મેળવવા અને સ્વચ્છતાની કાળજી રાખવા કિશોરીઓને અનુરોધ કરાયો હતો.

કિશોરાવસ્થામાં શરીર અને મનમાં થતા કુદરતી ફેરફારો અંગે વૈજ્ઞાનિક સમજ આપવામાં આવી હતી. મૂંઝવણ અને સંકોચ દૂર કરવા યોગ્ય માહિતી, પોષણયુક્ત આહાર, વ્યક્તિગત સ્વચ્છતા, પૂરતી ઊંઘ અને પરિવારનો સહયોગ મહત્ત્વનો હોવાનું જણાવાયું હતું.

કાર્યક્રમના અંતે અર્ચનાબેન ભગોરાએ મુશ્કેલી કે જરૂરિયાતના સમયે સખી વન સ્ટોપ સેન્ટર દ્વારા મળતી નિઃશુલ્ક સેવાઓ તેમજ કાનૂની અને અન્ય સહાય અંગે માહિતી આપી હતી. કાર્યક્રમનો હેતુ બાળકો અને કિશોરીઓમાં વ્યક્તિગત સુરક્ષા, શરીર અંગેની સાચી સમજ, માસિક સ્વચ્છતા તથા કિશોરાવસ્થાના શારીરિક અને માનસિક ફેરફારો અંગે વૈજ્ઞાનિક અને વ્યવહારુ જાગૃતિ કેળવવાનો હતો, તેમ કચેરીએ જણાવ્યું હતું.