ભુજમાં ‘પાંજી ધી પાંજી શાન’ કાર્યક્રમમાં એક દીકરીવાળા અને દત્તક પરિવારોનું બહુમાન

જિલ્લા મહિલા અને બાળ અધિકારીની કચેરી કચ્છ તથા કચ્છ મહિલા કલ્યાણ કેન્દ્રના સંયુક્ત ઉપક્રમે ‘બેટી બચાઓ, બેટી પઢાઓ’ અભિયાન અંતર્ગત ભુજ સ્થિત કચ્છ મહિલા કલ્યાણ કેન્દ્ર ખાતે ‘પાંજી ધી પાંજી શાન’ કાર્યક્રમ યોજાયો હતો. સમાજમાં દીકરીઓનું ગૌરવ વધે, કન્યા કેળવણીને પ્રોત્સાહન મળે અને દીકરીઓ પ્રત્યેની સામાજિક માનસિકતામાં સકારાત્મક બદલાવ આવે તે હેતુથી કાર્યક્રમ યોજાયો હતો.

કાર્યક્રમની શરૂઆતમાં માત્ર એક જ દીકરી ધરાવતા પરિવારો તેમજ અનાથ દીકરીને દત્તક લઈ ઉછેરતા પરિવારોનું સન્માન કરવામાં આવ્યું હતું. તેમની ઉમદા ભાવનાને બિરદાવવામાં આવી હતી.

કાર્યક્રમનું મુખ્ય આકર્ષણ ‘ડિનર વિથ લાડલી’ રહ્યું હતું. માત્ર દીકરીઓ જ ધરાવતા પરિવારોએ પોતાની દીકરીઓ સાથે બેસીને ભોજનનો આનંદ માણ્યો હતો. દીકરીઓ અને માતા-પિતા વચ્ચે આત્મીયતા વધે અને તેઓ એકબીજાને વધુ સારી રીતે સમજી શકે તે માટે વિવિધ મનોરંજક રમતો યોજાઈ હતી. પરિવારોએ ઉત્સાહભેર ભાગ લીધો હતો.

દીકરીઓએ સુંદર પ્રસ્તુતિઓ કરી હતી. સહભાગી દીકરી આયુષીબેન પલણે ગણેશ વંદના રજૂ કરી હતી, જ્યારે નાનકડી દીકરી નાયસા ભટ્ટે હનુમાન ચાલીસાનું પઠન કર્યું હતું.

કચ્છ-મોરબી વિસ્તારના સાંસદ વિનોદભાઈ ચાવડાએ કાર્યક્રમની સરાહના સાથે શુભેચ્છા સંદેશ મોકલ્યો હતો. ટેલિફોનિક માધ્યમથી જોડાઈ તેમણે ઉપસ્થિત દીકરીઓ અને વાલીઓને દીકરીઓના ઉજ્જવળ ભવિષ્ય માટે શુભેચ્છા પાઠવી પ્રોત્સાહિત કર્યા હતા.

કાર્યક્રમમાં ચાઇલ્ડ વેલ્ફેર સમિતિના ચેરમેન રીટાબેન તથા સમિતિના સભ્યો, કચ્છ મહિલા કલ્યાણ કેન્દ્રનાં પ્રમુખ કમળાબેન વ્યાસ અને કારોબારી સભ્યો ઉપસ્થિત રહ્યા હતા. શ્રી ભાવનાબેન ગરવલીયાએ કાર્યક્રમનું સંચાલન કર્યું હતું. કાર્યક્રમને સફળ બનાવવા જિલ્લા મહિલા અને બાળ અધિકારીની ટીમે જવાબદારી નિભાવી હતી.