ગેટ્સ-ટાટા પ્રતિનિધિમંડળે પ્રાઇમ યુએવીનું AI/ML મોડલ નિહાળ્યું

અમદાવાદ : ભારતમાં મચ્છર અને વેક્ટર-બોર્ન રોગચાળાના નિયંત્રણ માટે અદ્યતન ઉપાયો શોધવાના હેતુથી યોજાયેલા કાર્યક્રમમાં બિલ એન્ડ મિલિન્ડા ગેટ્સ ફાઉન્ડેશન (USA) અને ટાટા આઈએચએફ (IHF - Tata Trusts) ના ૧૭ સભ્યોના વૈશ્વિક પ્રતિનિધિમંડળે ગુજરાત સ્થિત ડ્રોન-ટેક સ્ટાર્ટઅપ પ્રાઇમ યુએવી પ્રાઇવેટ લિમિટેડ (Prime UAV Pvt. Ltd.)નું AI/ML આધારિત મચ્છરજન્ય રોગચાળા નિયંત્રણ મોડલ નિહાળ્યું હતું.

જાહેર આરોગ્ય ક્ષેત્રે ટેકનોલોજી વિકસાવનાર પ્રાઇમ યુએવીએ ડ્રોન ઇન્ટેલિજન્સ મારફતે ‘એડવાન્સ લાર્વલ સોર્સ મેનેજમેન્ટ’ (Advance LSM through Drone Intelligence) હેઠળ ચાર મહત્વપૂર્ણ તકનીકો તૈયાર કરી છે. AI/ML આધારિત ડ્રોન સામાન્ય રીતે પહોંચી ન શકાય તેવા દુર્ગમ વિસ્તારોમાં છુપાયેલા મચ્છર ઉત્પત્તિ કેન્દ્રો શોધી ગ્રાઉન્ડ ટીમને તુરંત માહિતી આપે છે.

મલેરિયા, ફાઈલેરિયા અને ડેન્ગ્યુના નિયંત્રણ માટે ગુજરાત સરકારના સરકારી તંત્ર સાથે મળીને ગાંધીનગર, અમદાવાદ, રાજકોટ, જૂનાગઢ, આણંદ અને મહેસાણા જિલ્લામાં આ ટેકનોલોજી આધારિત મોડેલ પ્રાયોગિક ધોરણે અમલી બનાવાયું છે અને સેવાઓ પૂરી પાડવામાં આવી છે.

આ ઇનોવેશન અને ગ્રાઉન્ડ લેવલના અમલીકરણ અંગે ૨૧ ઓક્ટોબર ૨૦૨૬ના રોજ યોજાયેલી સંયુક્ત બેઠકમાં કેન્દ્ર (ICMR) અને ગુજરાત સરકારના ૯ ઉચ્ચ અધિકારીઓ, વિષય નિષ્ણાતો, પ્રાઇમ યુએવી, ગેટ્સ ફાઉન્ડેશન તેમજ ટાટા ટ્રસ્ટના પ્રતિનિધિઓએ ટેકનોલોજીકલ પ્રગતિ અંગે વિગતવાર ચર્ચા કરી હતી.

પ્રાઇમ યુએવી પ્રા. લિ.ના સીઈઓ પ્રદિપ પટેલ અને સીટીઓ હિતેન પટેલે જણાવ્યું હતું કે પ્રતિનિધિમંડળે ટેકનોલોજી અને સરકારી અધિકારીઓ સાથેના વાસ્તવિક અનુભવોની માહિતી મેળવી, જેથી ગુજરાતના આ મોડેલને અન્ય દેશોમાં પણ લાગુ કરી શકાય. કંપનીએ આ મોડેલને મચ્છરજન્ય રોગચાળાના નિયંત્રણ માટેની નોંધપાત્ર ટેકનિકલ સિદ્ધિ ગણાવી હતી.