સરકારે સોલાર રૂફટોપ માટે વધારાની સબસિડી જાહેર કરી

મુખ્યમંત્રી શ્રી ભૂપેન્દ્રભાઈ પટેલની અધ્યક્ષતામાં આજે મળેલી રાજ્ય મંત્રીમંડળની બેઠકમાં 'પીએમ સૂર્ય ઘર: મુફ્ત બિજલી યોજના' હેઠળ ૨ કિલોવોટ ક્ષમતા સુધીની સોલાર રૂફટોપ સિસ્ટમ લગાવનારા પરિવારો માટે વધારાની સ્ટેટ સબસિડી આપવાનો નિર્ણય લેવાયો છે. પ્રવક્તા મંત્રી શ્રી જીતુભાઈ વાઘાણીએ જણાવ્યું કે આ નિર્ણયથી સામાન્ય વીજ ગ્રાહકોએ કુલ ખર્ચના માત્ર ૧૦% અને અનુસૂચિત જાતિ (SC) તથા અનુસૂચિત જનજાતિ (ST)ના વીજ ગ્રાહકોએ માત્ર ૫% ફાળો આપવાનો રહેશે. કેન્દ્ર સરકારની સહાય અને લાભાર્થીના ફાળા બાદનો બાકીનો ખર્ચ રાજ્ય સરકાર સબસિડીરૂપે ભોગવશે.

આ નિર્ણયથી રાજ્યના ૩ લાખથી વધુ સામાન્ય અને મધ્યમવર્ગીય પરિવારોને સીધો લાભ મળશે. રાજ્ય સરકાર અંદાજે રૂ. ૧,૦૦૦ કરોડનો ખર્ચ ભોગવશે, તેમ મંત્રીએ જણાવ્યું હતું.

મંત્રીએ આપેલા ઉદાહરણ મુજબ, ૧ કિલોવોટની સોલાર પેનલનો કુલ ખર્ચ રૂ. ૫૪,૦૦૦ છે. અગાઉ કેન્દ્ર સરકાર તરફથી રૂ. ૩૨,૪૦૦ સહાય મળતી હતી અને લાભાર્થીએ રૂ. ૨૧,૬૦૦ ચૂકવવા પડતા હતા. હવે સામાન્ય નાગરિકે માત્ર રૂ. ૫,૪૦૦ અને SC/ST વર્ગના નાગરિકે માત્ર રૂ. ૨,૭૦૦ ચૂકવવાના રહેશે. આ ક્ષમતા માટે રાજ્ય સરકારની સબસિડી સામાન્ય વર્ગ માટે રૂ. ૧૬,૨૦૦ અને SC/ST વર્ગ માટે રૂ. ૧૮,૯૦૦ રહેશે.

૨ કિલોવોટની સોલાર પેનલનો કુલ ખર્ચ રૂ. ૧,૦૭,૨૦૦ છે. અગાઉ કેન્દ્ર સરકાર તરફથી રૂ. ૬૨,૮૦૦ સહાય મળતી હતી અને લાભાર્થીએ રૂ. ૪૪,૪૦૦ ચૂકવવા પડતા હતા. હવે સામાન્ય નાગરિકે માત્ર રૂ. ૧૦,૭૨૦ અને SC/ST વર્ગના નાગરિકે માત્ર રૂ. ૫,૩૬૦ ચૂકવવાના રહેશે. આ ક્ષમતા માટે રાજ્ય સરકારની સબસિડી સામાન્ય વર્ગ માટે રૂ. ૩૩,૬૦૦ અને SC/ST વર્ગ માટે રૂ. ૩૮,૯૬૦ રહેશે.

પ્રેસ રિલીઝ અનુસાર, વડાપ્રધાન શ્રી નરેન્દ્રભાઈ મોદીની 'પીએમ સૂર્ય ઘર: મુફ્ત બિજલી યોજના'ના સ્વપ્નને સાકાર કરવામાં ગુજરાત સમગ્ર દેશમાં મોખરે રહ્યું છે. અત્યાર સુધીમાં રાજ્યના ૧૪ લાખથી વધુ પરિવારોએ ઘરની છત પર સોલાર સિસ્ટમ લગાવી છે. તેમાંથી માત્ર 'પીએમ સૂર્ય ઘર' યોજના હેઠળ ૮.૫ લાખથી વધુ ઘરો પર સોલાર રૂફટોપ સ્થાપિત કરીને ગુજરાતે સમગ્ર દેશમાં પ્રથમ સ્થાન મેળવ્યું છે. યોજનાથી નાગરિકોનું વીજ બિલ શૂન્ય થઈ રહ્યું છે અને વધારાની વીજળી ઉત્પન્ન કરીને પરિવારો આવક પણ મેળવી રહ્યા છે.

પ્રવક્તા મંત્રીશ્રીએ જણાવ્યું કે મુખ્યમંત્રી શ્રી ભૂપેન્દ્રભાઈ પટેલના નેતૃત્વ હેઠળની રાજ્ય સરકાર નાગરિકોના સર્વાંગી વિકાસ અને પર્યાવરણપ્રિય હરિત ઊર્જાનો વ્યાપ વધારવા માટે સતત પ્રયત્નશીલ છે.