ED એ AAPના ધારાસભ્ય અમનદીપ કૌરના ઠેકાણાઓ પર દરોડા પાડ્યા

એનફોર્સમેન્ટ ડિરેક્ટોરે (ED) બુધવારે પંજાબના મોગા જિલ્લામાં આમ આદમી પાર્ટીના ધારાસભ્ય અને પાર્ટીના મહિલા પાંખના પંજાબ પ્રદેશ અધ્યક્ષ અમનદીપ કૌર અરોરાના નિવાસસ્થાને સર્ચ ઓપરેશન હાથ ધર્યું હતું. હિન્દુસ્તાન ટાઈમ્સના અહેવાલ મુજબ, આ કાર્યવાહીમાં અમનદીપ કૌર ઉપરાંત તેમના પતિ રાકેશ અરોરા, પરિવારના સભ્યો અને અન્ય સહયોગીઓના ઠેકાણાઓનો સમાવેશ કરવામાં આવ્યો હતો.

ED દ્વારા પંજાબમાં કુલ ૭ સ્થળોએ એકસાથે દરોડા પાડવામાં આવ્યા હતા. આ તપાસ સરકારી અને સંસ્થાકીય મિલકતોના કથિત છેતરપિંડીભર્યા સંપાદન અને જાહેર ભંડોળના દુરુપયોગના સંબંધમાં કરવામાં આવી છે. તપાસ એજન્સીએ આ મામલે એનફોર્સમેન્ટ કેસ ઇન્ફોર્મેશન રિપોર્ટ (ECIR) નોંધ્યો છે. અધિકારીઓએ જણાવ્યું હતું કે, આ સર્ચ ઓપરેશનનો મુખ્ય હેતુ પોલીસ FIR અને એજન્સીના ECIR માં નામિત આરોપીઓ દ્વારા કરવામાં આવેલી કથિત ભ્રષ્ટાચારની પ્રવૃત્તિઓ અને મની ટ્રેઇલનો પર્દાફાશ કરવાનો છે.

આ કેસની શરૂઆત ૧૬ જૂન, ૨૦૨૪ના રોજ પંજાબ પોલીસ દ્વારા નોંધાયેલી FIR થી થઈ હતી. આ FIR નેશનલ હાઈવે નંબર ૭૫૪એ માટે સંપાદિત કરવામાં આવેલી સરકારી જમીનની છેતરપિંડીથી મ્યુટેશન અને વળતરની ખોટી ચૂકવણી અંગેની હતી. આ FIR ના આધારે ED એ પોતાની તપાસ શરૂ કરી હતી.

દરોડા દરમિયાન અમનદીપ કૌર અને તેમના પતિ રાકેશ અરોરાના પરિવારના સભ્યોના ઘર ઉપરાંત, રાકેશ અરોરા સાથે સંકળાયેલી વ્યસનમુક્તિ હોસ્પિટલમાં પણ તપાસ કરવામાં આવી હતી. ED ની ટીમો પુરાવા એકત્રિત કરવા માટે આ ઓપરેશન કરી રહી હતી, જેમાં એજન્સીએ અગાઉથી જ ડિજિટલ પુરાવા સહિતની ઘણી સામગ્રી એકઠી કરી લીધી છે.

બીજી તરફ, NDTV ઇન્ડિયાના અહેવાલ મુજબ, આ દરોડાઓ ૩૬ કલાક સુધી ચાલ્યા હતા, જેમાં અમનદીપ કૌરના બે ઘરો સહિત કુલ સાત સ્થળોએ તપાસ કરવામાં આવી હતી. દરોડા પૂર્ણ થયા બાદ AAP ધારાસભ્યે જણાવ્યું હતું કે, તપાસ ટીમમાં કંઈપણ હાથ આવ્યું નથી અને તેઓ ખાલી હાથે પરત ફર્યા છે.