સેન્સર બોર્ડ દ્વારા ફિલ્મો માટે ૩૫ વર્ષ પછી નવા નિયમો જાહેર

સેન્ટ્રલ બોર્ડ ઓફ ફિલ્મ સર્ટિફિકેશન (CBFC) એ ભારતીય સિનેમા અને ફિલ્મ નિર્માતાઓ માટે મોટા ફેરફારો અમલમાં મૂક્યા છે. માહિતી અને પ્રસારણ મંત્રાલયે ફિલ્મોના પ્રદર્શન અને પ્રમાણપત્ર માટે નવી ગાઈડલાઈન જાહેર કરી છે. આ નવા નિયમો ૬ ડિસેમ્બર ૧૯૯૧થી ચાલી આવતા ૩૫ વર્ષ જૂના ફ્રેમવર્કનું સ્થાન લેશે.

ટીવી૯ ગુજરાતીના અહેવાલ મુજબ, આ રિવાઈઝ ગાઈડલાઈનમાં પડદા પર દેખાવાતા ગુનો, હિંસા, નશીલા પદાર્થોનું સેવન, સ્મોકિંગ, યૌન સામગ્રી, મહિલાઓ, બાળકો, પ્રાણીઓનું ચિત્રણ અને રાષ્ટ્રીય સુરક્ષા સાથે જોડાયેલા દ્રશ્યો માટે સ્પષ્ટ સીમાઓ નક્કી કરવામાં આવી છે. સરકારના જણાવ્યા અનુસાર, આ નિયમોનો મુખ્ય ઉદ્દેશ્ય સમાજના બદલાતા મૂલ્યો સાથે તાલમેલ બેસાડવાનો અને કલાત્મક અભિવ્યક્તિ તથા રચનાત્મક સ્વતંત્રતાની રક્ષા કરવાનો છે.

નવા ફ્રેમવર્કમાં સિનેમાની ઉત્કૃષ્ટતા અને રચનાત્મક આઝાદીને પ્રોત્સાહન આપવાની સાથે સામાજિક સંવેદનશીલતા જાળવવા પર ભાર મૂકવામાં આવ્યો છે. સરકારનું કહેવું છે કે ફિલ્મ સર્ટિફિકેશનનો હેતુ બિનજરૂરી પ્રતિબંધો લાદવાનો નથી, પરંતુ જવાબદાર વાર્તા કહેવા અને સર્જનાત્મક અભિવ્યક્તિ વચ્ચે સંતુલન જાળવીને પ્રેક્ષકોને સ્વચ્છ અને સ્વસ્થ મનોરંજન પૂરું પાડવાનો છે.

નવા નિયમોમાં બાળકોના રક્ષણ માટે બાળકોને બિનજરૂરી રીતે પીડિતો, ગુનેગારો અથવા હિંસાના સાક્ષી તરીકે દર્શાવવા પર પ્રતિબંધ છે. સાથે જ બાળ દુર્વ્યવહાર દર્શાવતા દ્રશ્યો પણ પ્રતિબંધિત રહેશે. મહિલાઓના સન્માન માટે તેમના અપમાન કરતા દ્રશ્યોને મંજૂરી મળશે નહીં. બળાત્કાર કે છેડતી જેવી જાતીય હિંસાના દ્રશ્યો જો વાર્તા માટે જરૂરી હોય તો પણ તેને ગ્રાફિક રીતે દર્શાવી શકાશે નહીં.

પ્રાણીઓ પ્રત્યેની ક્રૂરતા અને દિવ્યાંગ વ્યક્તિઓની મજાક ઉડાવતા દ્રશ્યો પર સખત પ્રતિબંધ રહેશે. નશીલી દવાઓના ઉપયોગ કે તસ્કરીના દ્રશ્યો માટે સ્ક્રીન પર ખાસ ચેતવણી બતાવવી ફરજિયાત રહેશે. અશ્લીલતા અને ડબલ મિનિંગના સંદર્ભમાં બોર્ડે સ્પષ્ટ કર્યું છે કે કોઈ પણ દ્રશ્ય, ડાયલોગ કે ગીત સામાન્ય માનવીય લાગણીઓને ઠેસ પહોંચાડનારું ન હોવું જોઈએ.