ઝારખંડમાં આદિવાસી નેતા નિશા ભગતની આત્મહત્યા, સોરેન સરકાર પર ગંભીર આક્ષેપો

ઝારખંડમાં એક દુઃખદ ઘટના સામે આવી છે, જેમાં આદિવાસી નેતા નિશા ભગતે આત્મહત્યા કરી લીધી છે. આ આત્મહત્યા પૂર્વે તેમણે ફેસબુક પર લાઈવ થઈને રાજ્યની હેમંત સોરેન સરકાર, સ્થાનિક વહીવટીતંત્ર અને જમીન સાથે જોડાયેલા કેટલાક શખ્સો પર ગંભીર આક્ષેપો કર્યા હતા.

'આજ તક'ના અહેવાલ મુજબ, નિશા ભગતે પોતાના અંતિમ ફેસબુક લાઈવમાં જણાવ્યું હતું કે તેઓ સતત પોતાના સમાજના અધિકારો માટે સંઘર્ષ કરી રહ્યા હતા, પરંતુ તેમને ક્યાંયથી પણ યોગ્ય સહયોગ મળ્યો ન હતો. તેમણે હેમંત સોરેન સરકાર પર નિશાન સાધતા કહ્યું હતું કે, જો સરકારની ખામીઓને ઉજાગર કરવી અને તેનો પર્દાફાશ કરવો એ ગુનો હોય, તો તેની કિંમત તેમણે ચૂકવવી પડી રહી છે. તેમણે આક્ષેપ કર્યો હતો કે તેમને સતત માનસિક રીતે પરેશાન કરવામાં આવી રહ્યા હતા અને મહિલાઓને અપમાનિત કરવાની ઘટનાઓ સામે તેઓ લાચાર અનુભવી રહ્યા હતા.

પોતાના લાઈવ વીડિયોમાં નિશા ભગતે જમીન સાથે જોડાયેલા કેટલાક લોકો પર પણ ગંભીર આક્ષેપો કર્યા હતા. તેમણે વહીવટીતંત્રની કામગીરી પર નારાજગી વ્યક્ત કરતા કહ્યું હતું કે, તેમણે પોતાની સુરક્ષા અને સમસ્યાઓ અંગે અનેકવાર વહીવટીતંત્ર સાથે વાત કરવાનો પ્રયાસ કર્યો હતો, પરંતુ તેમને કોઈ પણ પ્રકારની મદદ મળી ન હતી. તેમણે ખાસ કરીને અજય તિર્કીનું નામ લઈને વહીવટીતંત્રની ભૂમિકા પર સવાલો ઉઠાવ્યા હતા. આ ઉપરાંત, તેમણે પિઠોરિયાના પોલીસ સ્ટેશન ઈન્ચાર્જ સાથે ફોન પર વાત કરી હોવાનો પણ ઉલ્લેખ કર્યો હતો. આ વાતચીત દરમિયાન તેમણે પોલીસની કાર્યવાહી પ્રત્યે પોતાનો રોષ ઠાલવ્યો હતો.

નિશા ભગતે આક્ષેપ કર્યો હતો કે તેમના ઘરે થયેલી ચોરીના મામલામાં પણ પોલીસે કોઈ નક્કર કાર્યવાહી કરી ન હતી અને ચોરને પકડવામાં નિષ્ફળ રહી હતી. જે લોકો તેમને બદનામ કરવાનો પ્રયાસ કરી રહ્યા હતા, તેમની સામે પણ કોઈ પગલાં લેવામાં આવ્યા ન હોવાનું તેમણે જણાવ્યું હતું. આ તમામ બાબતોને કારણે તેઓ અત્યંત માનસિક તણાવમાં હતા અને તેમણે પોતાની ગંભીર પરેશાનીઓનો ઉલ્લેખ લાઈવ દરમિયાન કર્યો હતો.

પોતાના પરિવાર વિશે વાત કરતા નિશા ભગત ભાવુક થઈ ગયા હતા. તેમણે જણાવ્યું હતું કે તેમના માતા-પિતાએ તેમને ખૂબ જ લાડ-પ્યારથી ઉછેર્યા હતા, પરંતુ આજે તેમની આ લડાઈને કારણે માતા-પિતાએ સમાજમાં ઘણી વાતો સાંભળવી પડી રહી છે. આ બાબતનું તેમને ખૂબ જ દુઃખ હતું. તેમણે કહ્યું હતું કે લોકો તેમને એક મજબૂત મહિલા તરીકે જોતા હતા, પરંતુ આ સંઘર્ષમાં તેઓ એકલા પડી ગયા હતા. તેમણે સ્પષ્ટ કર્યું હતું કે તેમને રાજકીય પક્ષો પાસેથી જે અપેક્ષા હતી, તે મુજબનો સાથ મળ્યો ન હતો અને તેઓ પોતાના સમાજના મુદ્દાઓ માટે એકલા હાથે લડી રહ્યા હતા.

નિશા ભગતે પોતાના લાઈવમાં એવું પણ કહ્યું હતું કે તેઓ આ પ્રકારની પરિસ્થિતિઓને વધુ સમય સુધી સહન કરી શકે તેમ ન હતા. તેમણે સિસ્ટમ અને ભૂ-માફિયાઓને પોતાની મોત માટે જવાબદાર ઠેરવ્યા હતા.

નિશા ભગત ઝારખંડના એક જાણીતા આદિવાસી નેતા હતા, જેઓ લાંબા સમયથી પોતાના સમાજના હિતો અને જમીનના અધિકારો માટે અવાજ ઉઠાવી રહ્યા હતા. તેઓ વિવિધ સામાજિક અને રાજકીય મુદ્દાઓ પર સક્રિય હતા અને પોતાના સમાજની સમસ્યાઓને વાચા આપવા માટે જાણીતા હતા. જોકે, આ ઘટનાએ તેમના લાંબા સંઘર્ષમય જીવનનો કરુણ અંત આણ્યો છે.