ભારત અને મ્યાનમાર વચ્ચે પ્રથમ ત્રિ-સેવા સંયુક્ત HADR કવાયત રાહત મિત્ર શરૂ

ભારત અને મ્યાનમાર દ્વારા ૦૫ નવેમ્બર ૨૦૨૬ના રોજ ચેન્નાઈ ખાતે પ્રથમ દ્વિપક્ષીય ત્રિ-સેવા માનવતાવાદી સહાય અને આપત્તિ રાહત (HADR) કવાયત ‘રાહત મિત્ર’ની શરૂઆત કરવામાં આવી છે. આ કવાયત ૦૫ થી ૦૬ નવેમ્બર ૨૦૨૬ સુધી ચાલશે.

પીઆઈબી (PIB) મુજબ, આ કવાયત ‘ટુગેધર ફોર હ્યુમેનિટી, સ્ટ્રોંગર થ્રુ પાર્ટનરશિપ’ થીમ પર આધારિત છે. તેનો મુખ્ય ઉદ્દેશ્ય બંને દેશોના સંરક્ષણ દળો વચ્ચે દ્વિપક્ષીય સહકાર મજબૂત કરવાનો, પરસ્પર વિશ્વાસ વધારવાનો અને સંકલન સુધારવાનો છે.

ભારતીય નૌકાદળના નેતૃત્વ હેઠળ આયોજિત આ કવાયતમાં બંને દેશોની ત્રણેય સેવાઓના ૩૦૦થી વધુ કર્મચારીઓ સામેલ થયા છે. આ મંચ દ્વારા બંને દેશોના સંરક્ષણ દળો વ્યાવસાયિક આદાનપ્રદન કરશે, અનુભવો વહેંચશે અને HADR કામગીરીમાં આંતર-કાર્યક્ષમતામાં વધારો કરશે.

આ કવાયત ભારતની ‘નેબરહુડ ફર્સ્ટ’ નીતિ અને મહાસાગર (MAHASAGAR) ના વ્યૂહાત્મક વિઝનને પ્રતિબિંબિત કરે છે. તે ભારત અને મ્યાનમાર વચ્ચેના લાંબા સમયના દ્વિપક્ષીય સંબંધો અને સંરક્ષણ સહકારને વધુ મજબૂત બનાવવાની દિશામાં એક મહત્વપૂર્ણ પગલું છે. આ સાથે જ, કટોકટીના સમયે માનવતાવાદી સહાય પૂરી પાડવા અને પ્રાદેશિક શાંતિ તથા સ્થિરતા જાળવી રાખવાના બંને રાષ્ટ્રોના સંકલ્પને આ કવાયત દ્વારા પુનઃબળ મળશે.