અસંગઠિત અને ગિગ કામદારો માટે રાષ્ટ્રીય સામાજિક સુરક્ષા બોર્ડની રચના

ભારતના વિશાળ અનૌપચારિક કાર્યબળને વ્યાપક સામાજિક સુરક્ષા પૂરી પાડવાના ઐતિહાસિક પગલા હેઠળ, શ્રમ અને રોજગાર મંત્રાલયે અસંગઠિત કામદારો તેમજ ગિગ અને પ્લેટફોર્મ કામદારો માટે રાષ્ટ્રીય સામાજિક સુરક્ષા બોર્ડની સત્તાવાર રચના કરવાની અધિચૂચના બહાર પાડી છે. PIB ના અહેવાલ મુજબ, સામાજિક સુરક્ષા સંહિતાના વૈધાનિક માળખા હેઠળ સ્થાપિત આ બોર્ડ ડિજિટલ ગિગ અને પ્લેટફોર્મ વ્યાવસાયિકોને દેશના ઔપચારિક કલ્યાણ માળખામાં સામેલ કરવાનું મહત્વપૂર્ણ કાર્ય કરશે.

આ બોર્ડની અધ્યક્ષતા કેન્દ્રીય શ્રમ અને રોજગાર મંત્રી કરશે. બોર્ડના સભ્ય તરીકે કેન્દ્ર અને રાજ્ય સરકારોના પ્રતિનિધિઓ, અગ્રણી એગ્રીગેટર કંપનીઓ, નિયોક્તાઓ, નાગરિક સમાજ સંગઠનો, કામદાર યુનિયનો અને ગિગ તથા પ્લેટફોર્મ એસોસિએશનોના પ્રતિનિધિઓ સામેલ રહેશે. બોર્ડનું મુખ્ય લક્ષ્ય પરંપરાગત અસંગઠિત કામદારોની સાથે લાખો ગિગ અને પ્લેટફોર્મ કામદારો વચ્ચેના સામાજિક સુરક્ષાના તફાવતને દૂર કરવા માટે લક્ષ્યાંકિત કલ્યાણકારી યોજનાઓ તૈયાર કરવી, તેની દેખરેખ રાખવી અને ભલામણ કરવાનો રહેશે.

નિયમો અનુસાર, રાષ્ટ્રીય સામાજિક સુરક્ષા બોર્ડ વર્ષમાં ઓછામાં ઓછી ત્રણ વખત બેઠક કરશે. આ બેઠકો દરમિયાન કેન્દ્ર સરકાર દ્વારા નિર્ધારિત કાર્યપદ્ધતિના નિયમોનું પાલન કરવામાં આવશે.

બોર્ડની મુખ્ય જવાબદારીઓમાં અસંગઠિત, ગિગ અને પ્લેટફોર્મ કામદારોના વિવિધ વર્ગો માટે યોગ્ય યોજનાઓ ઘડવા માટે કેન્દ્ર સરકારને ભલામણ કરવી અને સંહિતાના વહીવટ સંબંધિત બાબતોમાં સરકારને સલાહ આપવાનો સમાવેશ થાય છે. આ ઉપરાંત, કેન્દ્ર સરકાર દ્વારા સંચાલિત સામાજિક કલ્યાણ યોજનાઓની દેખરેખ રાખવી, રાજ્ય સ્તરે રેકોર્ડ રાખવાના કાર્યોની સમીક્ષા કરવી અને ભંડોળ તથા ખાતામાંથી થતા ખર્ચની સમીક્ષા કરવાનું પણ બોર્ડનું કાર્ય રહેશે. આ ઉપરાંત, કેન્દ્ર સરકાર દ્વારા સમયાંતરે સોંપવામાં આવેલી અન્ય કામગીરી પણ બોર્ડ દ્વારા કરવામાં આવશે.