ઓપન જેલના કેદીની થાઈલેન્ડ મુસાફરી, જેલ વોર્ડરની મદદથી પાંચ દિવસ વિતાવ્યા

રાજસ્થાનના શ્રીગંગાનગર જિલ્લાની ઓપન જેલમાં આજીવન કેદની સજા ભોગવી રહેલો એક હત્યારો જેલ વોર્ડરની મિલીભગતથી પાંચ દિવસ માટે થાઈલેન્ડ ફરવા ગયો હતો. આ સમગ્ર ઘટના દરમિયાન સૌથી ચોંકાવનારી બાબત એ છે કે, જ્યારે આ કેદી વિદેશમાં હતો ત્યારે પણ જેલના સત્તાવાર રેકોર્ડમાં તેની હાજરી પુરાવવામાં આવી રહી હતી. આ કૌભાંડનો ખુલાસો થયા બાદ જેલ પ્રશાસનમાં ભારે ખળભળાટ મચી ગયો છે.

અમર ઉજાલાના અહેવાલ મુજબ, આ કેદીનું નામ દીક્ષંત કામરા છે. આ મામલાનો પર્દાફાશ એક મહિલાની ફરિયાદ બાદ થયો હતો. જેલ મહાનિર્દેશક અશોક રાઠોડે જણાવ્યું હતું કે, તાજેતરમાં એક મહિલા તેના પરિવાર સાથે તેમની કચેરીએ આવી હતી. આ મહિલાએ દીક્ષંત કામરા પર તેને છેતર્યા હોવાનો અને માનસિક રીતે પરેશાન કર્યા હોવાનો ગંભીર આરોપ લગાવ્યો હતો. મહિલાએ વધુમાં જણાવ્યું હતું કે કામરા પાસે હથિયારો છે અને તે નશાના ગેરકાયદેસર વેપારમાં સંલગ્ન છે. આ સાથે જ મહિલાએ એવો ખુલાસો કર્યો હતો કે કામરા જેલમાં હોવા છતાં વિદેશ પ્રવાસ કરી આવ્યો છે.

મહિલાની આ ફરિયાદને ગંભીરતાથી લઈને જેલ મહાનિર્દેશકે અધિકારીઓને સૂચના આપી હતી કે સાંજના સમયે કેદીઓની જે ગણતરી એટલે કે રોલ કોલ કરવામાં આવે છે, તેના પર ખાસ નજર રાખવામાં આવે. જ્યારે તપાસ કરવામાં આવી ત્યારે રેકોર્ડ મુજબ દીક્ષંત કામરા જેલમાં જ હાજર હોવાનું દર્શાવતું હતું. ત્યારબાદ જ્યારે પોલીસ દ્વારા તેની ગાડીની તલાશી લેવામાં આવી, ત્યારે ગાડીમાંથી અફીમ મળી આવ્યું હતું. આ મામલે પોલીસે તેની સામે NDPS એક્ટ હેઠળ ગુનો દાખલ કર્યો છે.

ગાડીમાંથી અફીમ મળી આવ્યા બાદ જેલ મહાનિર્દેશકે દીક્ષંત કામરાના પાસપોર્ટની વિગતો મેળવી હતી. પાસપોર્ટની તપાસ દરમિયાન ચોંકાવનારી હકીકત સામે આવી કે કામરા ૯ ઓક્ટોબર ૨૦૨૫ના રોજ થાઈલેન્ડ ગયો હતો અને ૧૩ ઓક્ટોબરના રોજ ભારત પરત ફર્યો હતો. આમ, તે કુલ પાંચ દિવસ વિદેશમાં રહ્યો હતો, પરંતુ આ સમયગાળા દરમિયાન જેલના દફતરે તેની હાજરી નોંધવામાં આવી હતી.

જેલ મહાનિર્દેશક અશોક રાઠોડે આ વિદેશ પ્રવાસ અને જેલના હાજરી રેકોર્ડ અંગેની તપાસ કરી રિપોર્ટ માંગ્યો હતો. તપાસમાં તે કર્મચારીની ઓળખ થઈ હતી જેણે કામરાની ખોટી હાજરી પુરાવી હતી. આ ગંભીર બેદરકારી અને મિલીભગત બદલ જેલ મહાનિર્દેશકે દીક્ષંત કામરા અને જેલ વોર્ડર હાપુરમ વિરુદ્ધ FIR નોંધવાના આદેશ આપ્યા છે. આ ઘટના બાદ વોર્ડર હાપુરમને તાત્કાલિક અસરથી સસ્પેન્ડ કરી દેવામાં આવ્યો છે.

આ કેસમાં એક મોટો પ્રશ્ન એ પણ ઉઠ્યો છે કે, ૨૦૧૮માં જ્યારે કામરાની ધરપકડ કરવામાં આવી હતી, ત્યારે તેનો પાસપોર્ટ જપ્ત કેમ કરવામાં આવ્યો ન હતો, જેના કારણે તે વિદેશ જવા માટે સમર્થ બન્યો હતો.

દીક્ષંત કામરા ૨૦૧૮માં જયપુરના ઝોટવાડા વિસ્તારમાં થયેલા દુષ્યંત હત્યાકાંડનો દોષી છે. આ કેસમાં પ્રિયા સેઠ, કામરા અને તેના સાથીદારોએ દુષ્યંતનું અપહરણ કર્યું હતું અને તેના પિતા પાસે ૧૦ લાખ રૂપિયાની ખંડણી માંગી હતી. અહેવાલ મુજબ, દુષ્યંતના ખાતામાં ૩ લાખ રૂપિયા જમા થયા બાદ આરોપીઓએ તેનું ગળું દબાવીને તેની હત્યા કરી નાખી હતી. હત્યા કર્યા બાદ આરોપીઓએ ચપ્પુ વડે તેનો ચહેરો બિગાડી નાખ્યો હતો અને મૃતદેહને સૂટકેસમાં ભરીને આમેર વિસ્તારમાં ફેંકી દીધો હતો. આઘાતજનક હત્યાકાંડ બાદ ૨૦૧૮માં દીક્ષંત કામરા અને પ્રિયા સેઠની ધરપકડ કરવામાં આવી હતી.