દિલ્હી-એનસીઆરમાં વાયુ પ્રદૂષણ રોકવા NHAI સજ્જ: ૬૦ સ્પ્રિંકલર અને ૧૪ એન્ટી-સ્મોગ ગન તૈનાત

નવી દિલ્હી :: શિયાળાના આગમન પૂર્વે દિલ્હી-એનસીઆરમાં રાષ્ટ્રીય ધોરીમાર્ગો અને એક્સપ્રેસવે પર વાયુ પ્રદૂષણ નિયંત્રણને સઘન બનાવવા માટે ભારતીય રાષ્ટ્રીય રાજમાર્ગ પ્રાધિકરણ (NHAI) દ્વારા ધૂળ નિયંત્રણના કડક પગલાં હાથ ધરવામાં આવ્યા છે. આ અંતર્ગત આશરે ૬૦ વોટર સ્પ્રિંકલર અને ટેન્કર, ૧૪ એન્ટી-સ્મોગ ગન, ૨૩ મિકેનિકલ રોડ સ્વીપિંગ મશીન, બે ટ્રેક્ટર-માઉન્ટેડ બ્રૂમર અને ૯૦૦થી વધુ શ્રમિકોને તૈનાત કરવામાં આવ્યા છે. આ ઉપરાંત, દિલ્હી-એનસીઆર ક્ષેત્રમાં ૧૫૭ કિલોમીટર લાંબા રાષ્ટ્રીય ધોરીમાર્ગના વિસ્તારો પર ૧૩ મિકેનિકલ રોડ સ્વીપિંગ મશીનો સંચાલિત થઈ રહ્યા છે.

NHAIના ટેકનિકલ સદસ્ય શ્રી આલોક દીપાંકરે પ્રદૂષણ નિયંત્રણ પગલાંઓની સમીક્ષા કરી હતી. તેમણે ફિલ્ડ ટીમોને તમામ સાધનો, શ્રમિકો અને પાણીના છંટકાવની સંપૂર્ણ તૈનાતી, એન્ટી-સ્મોગ ગનના નિયમિત સંચાલન અને દૈનિક મિકેનિકલ સ્વીપિંગ સુનિશ્ચિત કરવા નિર્દેશ આપ્યા હતા. તેમણે વાયુ ગુણવત્તા વ્યવસ્થાપન પંચ દ્વારા નિર્ધારિત ધોરણોના કડક પાલન પર ભાર મૂક્યો હતો, જેમાં બાંધકામ સામગ્રીને ઢાંકવી, ધૂળમુક્ત રસ્તાની સપાટી જાળવવી અને ગ્રેડેડ રિસ્પોન્સ એક્શન પ્લાન અનુસાર કડક પગલાં ભરવાનો સમાવેશ થાય છે. અધિકારીઓને દૈનિક પ્રવૃત્તિઓ પર નજર રાખવા અને જિયો-ટેગવાળા ફોટોગ્રાફ્સ સાથે પ્રગતિ અહેવાલ રજૂ કરવા આદેશ અપાયો છે.

પર્યાવરણીય પહેલના ભાગરૂપે NHAI દ્વારા નાણાકીય વર્ષ ૨૦૨૫-૨૬ દરમિયાન રાષ્ટ્રીય રાજધાની ક્ષેત્રમાં ૯.૫૨ લાખના લક્ષ્યાંક સામે આશરે ૯.૮૦ લાખ છોડ વાવવામાં આવ્યા છે, જેમાં વૃક્ષો બચી જવાનો દર ૯૦ ટકાથી વધુ રહ્યો છે. આ ઉપરાંત દિલ્હીના લેન્ડફિલ સ્થળોમાંથી આશરે ૧૩.૫૮ લાખ ટન અક્રિય કચરાનો ઉપયોગ યુઇઆર-II અને ડીએનડી-સોહના કોરિડોરના તટબંધ નિર્માણમાં કરવામાં આવ્યો છે.

આ સમીક્ષા બેઠકમાં અર્બન એક્સ્ટેંશન રોડ-II, દ્વારકા એક્સપ્રેસવે, ડીએનડી-સોહના એક્સપ્રેસવે અને દિલ્હી-દેહરાદૂન એક્સપ્રેસવે સહિતના મુખ્ય ટ્રાફિક નિયમન પ્રોજેક્ટ્સની પણ સમીક્ષા કરાઈ હતી. આ પ્રોજેક્ટ્સ વાહનોના ઉત્સર્જન અને ટ્રાફિક જામ ઘટાડવામાં મદદરૂપ બનશે. સાથે જ ગ્રીન દિલ્હી એપ અને સોશિયલ મીડિયા પર મળતી ફરિયાદોના ઝડપી નિકાલ પર પણ ભાર મુકાયો હતો.