રાષ્ટ્રીય રક્ષા યુનિવર્સિટીમાં પોલીસ સ્મૃતિ દિવસે શહીદોને શ્રદ્ધાંજલિ

ગાંધીનગર તા. ૨૧ ઓક્ટોબર - રાષ્ટ્રીય રક્ષા યુનિવર્સિટી ખાતે રાષ્ટ્રની એકતા, અખંડિતતા, શાંતિ અને નાગરિકોની સુરક્ષા માટે પ્રાણોનું સર્વોચ્ચ બલિદાન આપનાર પોલીસ જવાનોની સ્મૃતિમાં પોલીસ સ્મૃતિ દિવસની ઉજવણી કરવામાં આવી હતી. ગુજરાતના રાજ્યપાલ આચાર્ય દેવવ્રતે શહીદોને શ્રદ્ધાંજલિ અર્પણ કરી તેમના પરિવારજનોના સમર્પણને નમન કર્યું હતું.

રાજ્યપાલે જણાવ્યું હતું કે દેશમાં શાંતિ અને કાયદો-વ્યવસ્થા જાળવવા જીવનની પરવા કર્યા વિના બલિદાન આપનારા શહીદો પ્રત્યે સમગ્ર રાષ્ટ્ર સદાય ઋણી રહેશે. સંતાનોને રાષ્ટ્રસેવામાં સમર્પિત કરનાર અને તેમને ફરજ પ્રત્યે નિષ્ઠાના સંસ્કાર આપનાર પરિવારજનો પ્રત્યે તેમણે સંવેદના અને આદર વ્યક્ત કર્યો હતો.

યુનિવર્સિટી કેમ્પસ ખાતે શહીદોની સ્મૃતિ જાળવવા અને આવનારી પેઢીને દેશભક્તિની પ્રેરણા આપવા શહીદ સ્મારક દીવાલનું ઉદ્ઘાટન કરાયું હતું. ગુજરાત પોલીસના શહીદોને શ્રદ્ધાંજલિ આપવા વિશેષ ડિજિટલ ડેશબોર્ડ અને ફાયરિંગ સિમ્યુલેટર લેબનું પણ લોન્ચિંગ કરાયું હતું. રાજ્યપાલે દિલ્હી સ્થિત રાષ્ટ્રીય પોલીસ સ્મારકનો ઉલ્લેખ કરીને કહ્યું હતું કે આવા સ્મારકો યુવાનો માટે રાષ્ટ્રપ્રેમ અને સમર્પણની પ્રેરણાના કેન્દ્રો બને છે.

રાજ્યપાલે જણાવ્યું હતું કે વડાપ્રધાન શ્રી નરેન્દ્રભાઇ મોદીજીએ ગુજરાતના મુખ્યમંત્રીપદના કાર્યકાળ દરમિયાન દેશમાં સર્વપ્રથમ ચિલ્ડ્રન્સ રિસર્ચ યુનિવર્સિટી, ટીચર્સ યુનિવર્સિટી, કામધેનુ યુનિવર્સિટી, ગુજરાત નેશનલ લો યુનિવર્સિટી અને રાષ્ટ્રીય રક્ષા યુનિવર્સિટી જેવી સંસ્થાઓ સ્થાપવાની પહેલ કરી હતી. તેમના જણાવ્યા મુજબ, આ સંસ્થાઓ વર્ષ ૨૦૪૭ સુધીમાં ભારતને ‘વિકસિત ભારત’ બનાવવાના મિશનમાં પાયાની મજબૂત ઈંટો સાબિત થશે.

તેમણે ઉમેર્યું હતું કે રાષ્ટ્રીય રક્ષા યુનિવર્સિટી દેશના વિવિધ પ્રદેશોમાંથી આવતા પોલીસ અને પેરામિલિટ્રી ફોર્સના જવાનોને આધુનિક સુરક્ષા, સાયબર ક્રાઈમ અને સમયની જરૂરિયાત મુજબનું પ્રશિક્ષણ આપી રહી છે. ભારત અહિંસા, શાંતિ, સહિષ્ણુતા અને ભાઈચારામાં માને છે, પરંતુ શાંતિ અને સત્યના રક્ષણ માટે સક્ષમ હોવું પણ જરૂરી છે, તેમ તેમણે જણાવ્યું હતું. કાયરતા અને નબળાઈથી શાંતિ જળવાતી નથી; દુષ્ટ તત્વો સામે આત્મરક્ષા અને રાષ્ટ્રરક્ષા માટે મજબૂત થવું વીરતાનું સાચું આભૂષણ છે. તેમણે યુવા પેઢી અને તાલીમાર્થીઓને ‘માતા ભૂમિઃ પુત્રો અહં પૃથિવ્યાઃ’ના ભાવ સાથે માતૃભૂમિની સેવા માટે તત્પર રહેવા આહ્વાન કર્યું હતું.

રાજ્યપાલના હસ્તે ફિઝિકલ એડવેન્ચર વોલનું ઉદ્ઘાટન કરાયું હતું અને જેલ સહાયક તરીકે પરીક્ષા ઉત્તીર્ણ થયેલા જવાનોને સર્ટિફિકેટ એનાયત કરાયા હતા.

રાષ્ટ્રીય રક્ષા યુનિવર્સિટીના કુલપતિ શ્રી વિમલ પટેલે શહીદ પોલીસ જવાનોને શ્રદ્ધાંજલિ અર્પી હતી. તેમણે આંતરિક સુરક્ષા અને કાયદો-વ્યવસ્થા જાળવવામાં પોલીસ દળો તથા સુરક્ષા સંસ્થાઓના યોગદાનને બિરદાવ્યું હતું. ‘વિકસિત ભારત ૨૦૪૭’ના લક્ષ્યને ધ્યાનમાં રાખીને સંસ્થાઓને આર્ટિફિશિયલ ઇન્ટેલિજન્સ અને ડિજિટલ પુરાવાઓથી સજ્જ થવા પર તેમણે ભાર મૂક્યો હતો.

કાર્યક્રમમાં પ્રો-વાઇસ ચાન્સલર પ્રો. કલ્પેશ વાંડરા, ડીન ડૉ. જસબીર કૌર ઠડાની, રજીસ્ટ્રાર શ્રી ધર્મેશ પ્રજાપતિ, યુનિવર્સિટીના પ્રાધ્યાપકો, સિનિયર અધિકારીઓ, તાલીમાર્થીઓ, પોલીસ અને સુરક્ષા દળોના પ્રતિનિધિઓ તથા શહીદોના પરિવારજનો ઉપસ્થિત રહ્યા હતા.