અબ્દુલ અલ-સૈયદ અમેરિકન સેનેટમાં ચૂંટાયેલા પ્રથમ મુસ્લિમ બન્યા

અમેરિકાની મધ્યસત્ર ચૂંટણીમાં ઐતિહાસિક વિજય મેળવીને ડૉ. અબ્દુલ અલ-સૈયદે અમેરિકન સેનેટના ઇતિહાસમાં નવું પ્રકરણ લખ્યું છે. ડેમોક્રેટિક પાર્ટીના ઉમેદવાર તરીકે મિશિગન સેનેટની બેઠક પરથી વિજય મેળવીને તેઓ યુએસ સંસદના ઉપલા ગૃહ એટલે કે સેનેટમાં પહોંચનારા પ્રથમ મુસ્લિમ સેનેટર બન્યા છે. અગાઉ અમેરિકી સંસદના નીચલા ગૃહ (હાઉસ ઓફ રિપ્રેઝન્ટેટિવ્સ)માં મુસ્લિમ સભ્યો ચૂંટાયા છે, પરંતુ સેનેટમાં કોઈ મુસ્લિમ નેતા પહોંચ્યા હોય તેવી આ પ્રથમ ઘટના છે.

ડેરોઈટ ખાતે યોજાયેલી ચૂંટણી પરિણામોના ઉજવણી કાર્યક્રમ દરમિયાન અબ્દુલ અલ-સૈયદે વિજયની જાહેરાત કરી હતી. તેમણે પોતાના કાર્યસ્થળ પર ભાવુક થઈને કહ્યું હતું કે, "મિશિગન, અમે કરી બતાવ્યું! મને મિશિગનના સેનેટર તરીકે તમારી સામે ઊભા રહેતા ખૂબ ગર્વ અને સન્માન અનુભવાય છે." આ ચૂંટણીમાં તેમનો સીધો મુકાબલો રિપબ્લિકન પાર્ટીના ઉમેદવાર અને પૂર્વ કોંગ્રેસમેન માઇક રોજર્સ સાથે હતો. ન્યૂ યોર્ક ટાઇમ્સના આંકડા મુજબ, આ અત્યંત સ્પર્ધાત્મક ચૂંટણીમાં અલ-સૈયદને ૫૧.૭ ટકા મત મળ્યા હતા, જ્યારે રાષ્ટ્રપતિ ડોનાલ્ડ ટ્રમ્પના નજીકના માનવામાં આવતા માઇક રોજર્સને ૪૬.૩ ટકા મત મળતા તેમણે હારનો સામનો કરવો પડ્યો હતો.

અબ્દુલ અલ-સૈયદની આ જીત ત્યારે થઈ જ્યારે ડેમોક્રેટિક પાર્ટી સેનેટ પર ફરીથી નિયંત્રણ મેળવવાનો પ્રયાસ કરી રહી હતી. તેઓ નિવૃત્ત થઈ રહેલા ડેમોક્રેટિક સેનેટર ગેરી પીટર્સનું સ્થાન લેશે. આ ચૂંટણી મિશિગનમાં ખૂબ જ ચર્ચિત રહી હતી કારણ કે ૨૦૨૪ની રાષ્ટ્રપતિ ચૂંટણીમાં આ રાજ્યએ ટ્રમ્પને નજીકથી ટેકો આપ્યો હતો. અલ-સૈયદના પ્રચાર દરમિયાન તેમના એજન્ડામાં 'યુનિવર્સલ હેલ્થકેર' (સૌ માટે આરોગ્ય સેવા) અને સરકારી જવાબદારી જેવા મુદ્દાઓ મુખ્ય હતા. તેમણે વચન આપ્યું હતું કે તેઓ અમેરિકાની જટિલ અને નફાખોરી આધારિત મેડિકલ સિસ્ટમને બદલવા માટે કામ કરશે, જેથી સામાન્ય નાગરિકોને ડોક્ટર પાસે જતી વખતે મોટો બિલ ન ચૂકવવું પડે.

ચૂંટણી પ્રચાર દરમિયાન અલ-સૈયદને આકરા વિરોધ અને આક્ષેપોનો સામનો કરવો પડ્યો હતો. રિપબ્લિકન પક્ષે ડેમોક્રેટ્સને સામ્યવાદી તરીકે દર્શાવવા માટે આક્રમક અભિયાન ચલાવ્યું હતું. રાષ્ટ્રપતિ ડોનાલ્ડ ટ્રમ્પે અલ-સૈયદ સામે અત્યંત આક્રમક વલણ અપનાવ્યું હતું અને તેમને "કટ્ટરપંથી જેહાદી", હમાસ અને મુસ્લિમ બ્રધરહુડના સમર્થક તરીકે ઓળખાવ્યા હતા. ટ્રમ્પે રેલીઓમાં એવું પણ કહ્યું હતું કે અલ-સૈયદ યુનાઇટેડ સ્ટેટ્સમાં શરિયા કાયદો લાગુ કરવા માંગે છે અને સેનેટમાં પ્રવેશતા પહેલા તેમની મેટલ ડિટેક્ટરથી તપાસ થવી જોઈએ.

અલ-સૈયદને માત્ર બહારથી જ નહીં પરંતુ પોતાની જ પાર્ટીના આંતરિક વિરોધનો પણ સામનો કરવો પડ્યો હતો. ઓગસ્ટ ૨૦૨૬માં થયેલી ડેમોક્રેટિક પ્રાઇમરી ચૂંટણીમાં તેમણે સત્તાધારી વર્ગના સમર્થન ધરાવતા સાંસદ હેલી સ્ટીવન્સને નજીવા અંતરથી હરાવ્યા હતા. જોકે, ચૂંટણીના અંતિમ તબક્કે હેલી સ્ટીવન્સે અલ-સૈયદને બદલે રિપબ્લિકન માઇક રોજર્સનું સમર્થન કરીને વિવાદ ઊભો કર્યો હતો. આ અવરોધ છતાં અલ-સૈયદે મિશિગનના મતદારોનો વિશ્વાસ જીતવામાં સફળતા મેળવી હતી.

વિજય બાદ પોતાના ભાષણમાં અબ્દુલ અલ-સૈયદે અમેરિકી વ્યવસ્થા પર પ્રહાર કરતા કહ્યું કે, અમેરિકાની તાકાત તેની ખામીઓને નજરઅંદાજ કરવામાં નથી, પરંતુ તેને સુધારવાની હિંમત બતાવવામાં છે. તેમણે કોર્પોરેટ કંપનીઓ અને અમીરોની ખાસ હિતોને પડકારવાની વાત કરી હતી. તેમણે નાગરિકોની આર્થિક મુશ્કેલીઓનો ઉલ્લેખ કરતા કહ્યું કે, દુનિયાના સૌથી ધનિક દેશમાં લોકોને કરિયાણું ખરીદવા, પેટ્રોલ ભરાવવા, ઘર ખરીદવા કે ડોક્ટર પાસે જવા માટે આટલી તકલીફ ન થવી જોઈએ. તેમણે વધુમાં ઉમેર્યું કે, "ટેક્સ ભરવો અને એ જાણવું કે તમારો ટેક્સ તમારા અને તમારા બાળકો પર ખર્ચાઈ રહ્યો છે, નહીં કે બીજા દેશના બાળકો પર બોમ્બ ફેંકવા માટે, તે આટલું અઘરું ન હોવું જોઈએ."

ઇઝરાયેલના સંદર્ભમાં પણ તેમણે સ્પષ્ટતા કરી હતી કે જો કોઈ માનતું હોય કે પેલેસ્ટિનિયન બાળકોને તેમના પૂર્વજોની જમીન પર નિર્દોષ રીતે જીવવાનો અધિકાર છે અને તેના માટે અમેરિકન ટેક્સનો ઉપયોગ ન થવો જોઈએ, તો તેને નફરત કહેવામાં ન આવે. તેમણે કહ્યું કે તમામ લોકો માટે શાંતિ, સન્માન અને આત્મનિર્ણયના સમાન અધિકારોની વાત કરવી એ નફરત નહીં પણ પ્રેમ છે. તેમણે મતદારોને સંદેશ આપ્યો કે આપણે ફરીથી મહાન બનવાની જરૂર નથી, પરંતુ જે બાબતે આપણે હંમેશા મહાન રહ્યા છીએ - એટલે કે આપણી જાતને સુધારવાની ઈચ્છાશક્તિ - તેને અપનાવવાની જરૂર છે.

અબ્દુલ અલ-સૈયદનો રાજકીય અને વ્યવસાયિક પ્રવાસ તબીબી ક્ષેત્રમાંથી શરૂ થયો હતો. તેઓ ડૉક્ટર તરીકે તાલીમ લીધા બાદ રાજકારણમાં આવ્યા હતા. તેમણે જણાવ્યું હતું કે રાજકીય વ્યવસ્થાની ખામીઓ જ લોકોની સ્વાસ્થ્ય સમસ્યાઓનું મુખ્ય કારણ છે. તેઓ અમેરિકાના સેનેટમાં ચૂંટાયેલા ૧૯૬૯ પછીના પ્રથમ ડેમોક્રેટિક ડૉક્ટર પણ છે. તેમના પ્રચાર દરમિયાન તેમણે રાજકારણમાંથી નાણાં દૂર કરવા અને સામાન્ય નાગરિકો માટે સરકારને કાર્યરત કરવાના વચનો આપ્યા હતા.

અબ્દુલ અલ-સૈયદનો જન્મ અને ઉછેર મિશિગનના મેટ્રો ડેટ્રોઇટમાં થયો હતો અને તેમના પિતા ઇજિપ્તના સ્થળાંતરિત હતા. તેમણે યુનિવર્સિટી ઓફ મિશિગનમાંથી બાયોલોજી અને પોલિટિકલ સાયન્સમાં સ્નાતક કર્યું હતું. ત્યારબાદ તેમણે કોલંબિયા યુનિવર્સિટીમાંથી મેડિકલ ડિગ્રી મેળવી હતી અને રોડ્સ સ્કોલર તરીકે યુનિવર્સિટી ઓફ ઓક્સફોર્ડમાંથી બીજી ડોક્ટરેટ પૂર્ણ કરી હતી. તેમણે વેન કાઉન્ટી ડિપાર્ટમેન્ટ ઓફ હેલ્થમાં ડાયરેક્ટર તરીકે પણ સેવા આપી હતી. કોલંબિયા યુનિવર્સિટીમાં તેઓ એપિડેમિયોલોજીના આસિસ્ટન્ટ પ્રોફેસર તરીકે પણ કાર્યરત હતા, જ્યાં તેમનું સંશોધન જાહેર આરોગ્ય પ્રણાલી અને સ્વાસ્થ્ય અસમાનતા પર કેન્દ્રિત હતું.

કિકર: અમેરિકા <caption>""</caption>